പണം നിക്കറിലിട്ട് ആടിന് മുന്നില്‍ വെച്ച് കുളിക്കാന്‍ പോയ യുവാവിന്റെ അവസ്ഥ നോക്കണേ, താന്‍ കുഞ്ഞിനെ പോലെ പരിപാലിക്കുന്ന ആടുകള്‍ തനിക്കിട്ടു പണിതന്നു എന്നാണ് യുവാവ് പറയുന്നത്. ഉത്തര്‍പ്രദേശിലെ കനൗജ് ജില്ലയിലെ സിലുവാപൂര്‍ ഗ്രാമത്തില്‍ സര്‍വേശ് കുമാര്‍ പാല്‍ എന്നയാള്‍ നിക്കറിന്റെ പോക്കറ്റില്‍ സൂക്ഷിച്ചിരുന്ന പണം ആട് കടിച്ചു തിന്നുകയായിരുന്നു.

താന്‍ ഭദ്രമായി സൂക്ഷിച്ചുവെച്ച പണം ആടുകള്‍ ഒരിക്കലും ദുരുപയോഗം ചെയ്യില്ലെന്ന് കരുതിയ പണമാണ് നഷ്ടമായതെന്ന് സര്‍വേശ് കുമാര്‍ നെടുവീര്‍പ്പിട്ടുകൊണ്ടുപറയുന്നു. വീടുപണിക്കായി കട്ടവാങ്ങാന്‍ സൂക്ഷിച്ചിരുന്ന 66,000 രൂപയാണ് ആടുകള്‍ വിഴുങ്ങിയത്. ബുധനാഴ്ചയാണ് സംഭവം. പുതിയ 2000 ന്റെ 31 നോട്ടുകളായിരുന്നു ആടുകള്‍ ചവച്ചരച്ചത്.

ഈ കാഴ്ച കണ്ട് ഓടിയെത്തിയ സര്‍വേശ് പാലിന് തിരിച്ചു കിട്ടിയതാകട്ടെ 2000 ന്റെ രണ്ടു നോട്ടുകള്‍ മാത്രം. അതാകട്ടെ കീറിപ്പറിഞ്ഞുപോവുകയും ചെയ് തിരുന്നു. സാധാരണ പേപ്പര്‍ ഉള്‍പ്പെടെ ഇഷ്ടമുള്ളവയെല്ലാം തിന്നാറുള്ള ആട് പണം തിന്നുന്നത് മാത്രം താന്‍ കണ്ടിട്ടില്ലെന്നാണ് സര്‍വേശ് പറയുന്നത്. ഒരു കുഞ്ഞിനെ പോലെ സ്നേഹിക്കുന്ന ആട് പണം തിന്നുപോയി എന്തു ചെയ്യാനാണെന്ന് സര്‍വേശ് ചോദിക്കുന്നു.

അതേസമയം പണം തിരിച്ചെടുക്കാന്‍ നിരവധി നിര്‍ദേശങ്ങള്‍ ഗ്രാമീണരില്‍ നിന്നും ഉണ്ടായി. വയറിളക്കാനും ഛര്‍ദ്ദിക്കാനുമുള്ള മരുന്ന് കൊടുത്ത് പണം തിരിച്ചെടുക്കാന്‍ ചിലര്‍ പറഞ്ഞു. എന്നാല്‍ മറ്റ് ചിലര്‍ ദൗര്‍ഭാഗ്യം കൊണ്ടുവന്ന ആടിനെ കശാപ്പുകാരന് വില്‍ക്കാനാണ് പറഞ്ഞത്.

ഗൗരവതരമായ കുറ്റകൃത്യം ചെയ്ത ആടിനെ പോലീസിന് കൈമാറാനും ചിലര്‍ പറഞ്ഞു. എന്തായാലും ആടിനെ കാണാന്‍ ഇപ്പോള്‍ പല സ്ഥലങ്ങളില്‍ നിന്നും ആളുകള്‍ സര്‍വേശിന്റെ വീട്ടിലേക്ക് എത്തിക്കൊണ്ടിരിക്കുകയാണ്. പലരും ആടിനൊപ്പം നിന്ന് സെല്‍ഫിയും എടുക്കുന്നുണ്ട്.