കുഴല്‍ക്കിണറില്‍ വീണ നാലു വയസ്സുകാരനെ 35 മണിക്കൂറിന്റെ കഠിന പരിശ്രമത്തിനൊടുവില്‍ രക്ഷപ്പെടുത്തി. 150 അടി താഴ്ചയുള്ള കുഴല്‍ക്കിണറില്‍ വീണ റോഷനെയാണ് മാരത്തോണ്‍ രക്ഷാപ്രവര്‍ത്തനത്തിലുടെ പുറത്തെടുത്തത്. മധ്യപ്രദേശിലെ ദേവാസ് ജില്ലയെ ഉമാരിയ ഗ്രാമത്തിലാണ് ഈ സംഭവമുണ്ടായത്.

ഇന്നലെ രാത്രി 10.45നാണ് കുഴല്‍ക്കിണറില്‍ നിന്ന് കുട്ടിയെ പുറത്തെടുത്തതെന്ന് ദേവാസ് ജില്ല പൊലീസ് സുപ്രണ്ട് അന്‍ഷുമാന്‍ സിങ് പറഞ്ഞു. കളിക്കുന്നതിനിടെ ശനിയാഴ്ച പകല്‍ 11 മണിയോടെ റോഷന്‍ മൂടാത്ത കുഴല്‍ക്കിണറില്‍ വീഴുകയായിരുന്നു. 30 അടി താഴ്ചയിലെത്തി കുട്ടി തടഞ്ഞ് നില്‍ക്കുകയായിരുന്നു. തുടര്‍ന്ന് കയറുപയോഗിച്ച് കുട്ടിയെ രക്ഷിക്കാനുള്ള ശ്രമങ്ങള്‍ ആര്‍മി ആരംഭിച്ചു. കുട്ടിക്ക് കുഴലിലുടെ ഓക്‌സിജന്‍ നല്‍കിയിരുന്നു. കുഴല്‍ കിണറിന് സമാന്തരമായി മറ്റൊരു കുഴിയുണ്ടാക്കി കുട്ടിയെ പുറത്തെത്തിക്കാനുള്ള ശ്രമമാണ് ആദ്യം നടത്തിയത്.

എന്നാല്‍, ഇതിന് കൂടുതല്‍ സമയമെടുക്കുമെന്നതിനാല്‍ ഈ നീക്കം ഉപേക്ഷിക്കുകയായിരുന്നു. പിന്നീട് കുഴല്‍കിണറിലേക്ക് കയറിട്ട് അതിലുടെ കുട്ടിയെ പുറത്തെത്തിച്ചു. രക്ഷാപ്രവര്‍ത്തനത്തോട് കുട്ടി പൂര്‍ണമായും സഹകരിച്ചതാണ് ദൗത്യം എളുപ്പമാക്കിയതെന്നും ആര്‍മി അധികൃതര്‍ വ്യക്തമാക്കി