റിലയന്‍സ് ഇന്‍ഡസ്ട്രീസ് ഉടമയും ബിസിനസ് വമ്പനുമായ മുകേഷ് അംബാനിയുടെ മൂത്ത മകൻ ആകാശ് അംബാനിയുടെ വിവാഹിതനാകുന്നുവെന്ന വാർത്ത മാധ്യമങ്ങളിൽ പ്രചരിച്ചിരുന്നു. എന്നാൽ വിവാഹക്കാര്യത്തെക്കുറിച്ച് അംബാനി കുടുംബം പ്രതികരിച്ചിരുന്നില്ല. ഇപ്പോഴിതാ ഒരു പൊതുപരിപാടിയില്‍ സംസാരിക്കവേ ആകാശ് അംബാനിയുടെ വിവാഹത്തെക്കുറിച്ച് തുറന്നുപറഞ്ഞിരിക്കുകയാണ് അമ്മ നിത അംബാനി.

മുകേഷും താനും ജീവിത പങ്കാളികളെ തിരഞ്ഞെടുക്കാന്‍ മക്കള്‍ക്ക് സ്വാതന്ത്ര്യം നല്‍കിയിട്ടുണ്ടെന്നും മകന്‍ വിവാഹിതനാകാന്‍ തീരുമാനിക്കുമ്പോള്‍ അതാരായാലും അവന്റെ തീരുമാനത്തെ തങ്ങള്‍ അംഗീകരിക്കുമെന്നും അമ്മ നിത പറയുന്നു. എല്ലാ സന്തോഷവും ആശംസിക്കുമെന്നും നിത പറഞ്ഞു. റോസി ബ്ലൂ ഡയമണ്ട്‌സ് ഉടമ റസല്‍ മേത്തയുടെ മകള്‍ ശ്ലോക മേത്തയെയാണ് ആകാശ് വിവാഹം കഴിക്കുന്നതെന്നായിരുന്നു പ്രചരണം. എങ്കിലും ശ്ലോകയുമായുള്ള വിവാഹ വാര്‍ത്തയില്‍ നിത പ്രതികരിച്ചിട്ടില്ല.

ധീരുഭായ് അംബാനി ഇന്റര്‍നാഷനല്‍ സ്‌കൂളില്‍ ഒരുമിച്ചു പഠിച്ചപ്പോള്‍ തുടങ്ങിയ ബന്ധമാണു വിവാഹത്തിലെത്തുന്നത്. നേരത്തെ ആകാശ് അംബാനിയുടെ വിവാഹ ക്ഷണക്കത്തു സംബന്ധിച്ചും ചില വാര്‍ത്തകള്‍ പുറത്തു വന്നിരുന്നു. വിവാഹത്തിനു മുന്നോടിയായി അംബാനി കുടുംബം തയാറാക്കിയ ക്ഷണക്കത്ത് 1.5 ലക്ഷം വിലമതിക്കുന്നതാണെന്നായിരുന്നു വാര്‍ത്ത. സ്വര്‍ണവും വിലപിടിപ്പുള്ള കല്ലുകളും ചേര്‍ത്തു നിര്‍മിച്ചിട്ടുള്ള ഈ ക്ഷണക്കത്ത് ഇന്ത്യയിലെ തന്നെ ഏറ്റവും വിലപിടിപ്പുള്ളതാണെന്നും പ്രചരണമുണ്ടായിരുന്നു. എന്നാല്‍ ആകാശ് അംബാനിയുടേതെന്ന പേരില്‍ പ്രചരിക്കുന്ന ക്ഷണക്കത്തില്‍ വാസ്തവമില്ലെന്നും ഇതുസംബന്ധിച്ച് അംബാനി ഗ്രൂപ്പ് ഔദ്യോഗിക പ്രഖ്യാപനം നടത്തിയിട്ടില്ലെന്നും അംബാനി കുടുംബത്തോട് അടുത്തമുള്ള വൃത്തങ്ങള്‍ പിന്നീടറിയിച്ചു. എന്തായാലും അന്നു പുറത്തുവന്ന വിവാഹക്ഷണക്കത്ത് യഥാര്‍ഥത്തില്‍ ആകാശിന്റേതു തന്നെയായിരിക്കുമോ എന്ന ചര്‍ച്ചകളും ഇപ്പോള്‍ ഉയരുന്നുണ്ട്. വരുന്ന മാര്‍ച്ച് ഇരുപത്തിനാലിനു വിവാഹ നിശ്ചയവും ഡിസംബറില്‍ വിവാഹവും നടക്കുമെന്നാണ് വാര്‍ത്തകള്‍ വന്നത്. ആകാശും ശ്ലോകയും സ്‌കൂള്‍ കാലം തൊട്ടേ ഒന്നിച്ചു പഠിച്ചവരാണ്.

വിവാഹവും വിവാഹ നിശ്ചയവും ഇന്ത്യയില്‍ തന്നെയായിരിക്കുമെന്നായിരുന്നു വിവരം. റസല്‍ മേത്തയുടെയും മോണയുടെയും മൂന്നു മക്കളില്‍ ഇളയവളാണു ശ്ലോക. ലണ്ടന്‍ സ്‌കൂള്‍ ഓഫ് ഇക്കണോമിക്‌സില്‍നിന്ന് നിയമത്തില്‍ ബിരുദാനന്തര ബിരുദം നേടിയ ശ്ലോക നിലവില്‍ റോസി ബ്ലൂ ഫൗണ്ടേഷന്റെ ഡയറക്ടര്‍മാരിലൊരാണ്. ബിസിനസ് ലോകത്തു നിന്നുള്ള പലരും ഇരുവരെയും അഭിനന്ദിച്ചുകൊണ്ട് രംഗത്തെത്തിയിരുന്നു.