നരച്ചമുടി മറയ്ക്കാന്‍ സാധാരണയായി എല്ലാവരും ഡൈ ചെയ്യുകയാണ് പതിവ്. എന്നാല്‍ വര്‍ഷങ്ങളായി ഡൈ ഉപയോഗിച്ച് നരച്ചമുടി കറുപ്പിച്ച അമ്പതുകാരിക്ക് ശാരീരികാസ്വാസ്ഥ്യം അനുഭവപ്പെട്ടതിനെ തുടര്‍ന്ന് ആശുപത്രിയിലെത്തിച്ചപ്പോഴാണ് ഞെട്ടിക്കുന്ന സംഭവം അറിഞ്ഞത്. ചൈനയിലാണ് സംഭവം. കഴിഞ്ഞ പത്തുവര്‍ഷങ്ങളായി എല്ലാ മാസവും തലമുടി കറുപ്പിക്കുന്ന ഇവര്‍ക്ക് ഉറങ്ങാന്‍ പോയപ്പോള്‍ ശാരീരികാസ്വാസ്ഥ്യം അനുഭവപ്പെടുകയായിരുന്നു. ശ്വസിക്കാന്‍ ബുദ്ധിമുട്ടുണ്ടാകുകയും ത്വക്കിന് മഞ്ഞനിറം ആയതോടുകൂടി ഭര്‍ത്താവ് ഇവരെ ആശുപത്രിയില്‍ എത്തിക്കുകയുമായിരുന്നു.

ബിലിറുബിന്റെ അളവ് വളരെയധികം കുറഞ്ഞതായി കണ്ടെത്തിയതോടുകൂടി ഇവര്‍ക്ക് മദ്യപിക്കുന്ന ശീലമുണ്ടോ എന്നായിരുന്നു ഡോക്ടര്‍മാരുടെ സംശയം. എന്നാല്‍ ഇത്തരം ശീലങ്ങളൊന്നുമില്ല എന്ന ഇവരുടെ മറുപടി ഡോക്ടര്‍മാരെ വീണ്ടും കുഴക്കുകയായിരുന്നു. തുടര്‍ന്നാണ് ഇവര്‍ മുടി കറുപ്പിക്കാറുണ്ടെന്നും ഇതിലെ കെമിക്കലുകളാണ് ഇവരുടെ കരള്‍വീക്കത്തിന് കാരണമെന്നും കണ്ടെത്തിയത്. ആരും സ്ഥിരമായി തലമുടി കറുപ്പിക്കരുതെന്നും ഈ മരുന്നുകളില്‍ അടങ്ങിയിരിക്കുന്ന കെമിക്കലുകള്‍ ആരോഗ്യത്തിന് ഹാനികരമാണെന്നും ക്യാന്‍സര്‍ വരാനുള്ള സാധ്യതയുണ്ടെന്നും ഡോക്ടര്‍മാര്‍ പറയുകയുണ്ടായി.