വിദേശ നിയമ സ്ഥാപനങ്ങള്‍ ഇന്ത്യയില്‍ ഓഫീസുകള്‍ തുറക്കാനോ വിദേശ അഭിഭാഷകര്‍ ഇന്ത്യന്‍ കോടതികളില്‍ പ്രാക്ടീസ് ചെയ്യാന്‍ പാടില്ലെന്ന് സുപ്രീംകോടതി
വിദേശ നിയമ സ്ഥാപനങ്ങള്‍ ഇന്ത്യയില്‍ ഓഫീസുകള്‍ തുറക്കാനോ വിദേശ അഭിഭാഷകര്‍ ഇന്ത്യന്‍ കോടതികളില്‍ പ്രാക്ടീസ് ചെയ്യാനോ പാടില്ലെന്ന് സുപ്രീംകോടതി വിധിച്ചു.
എന്നാല്‍, വിദേശ അഭിഭാഷകര്‍ക്ക് ഇന്ത്യന്‍ കക്ഷികള്‍ക്കായി താല്‍ക്കാലികാടിസ്ഥാനത്തില്‍ ഇവിടെയെത്തി ഉപദേശങ്ങള്‍ നല്‍കി മടങ്ങാം. ഈ വിഷയത്തില്‍ സര്‍ക്കാറും ബാര്‍ കൗണ്‍സിലും കൃത്യമായ നിര്‍ദേശങ്ങളുണ്ടാക്കണമെന്ന് കോടതി നിര്‍ദേശിച്ചു.
ജസ്റ്റിസുമാരായ ആദര്‍ശ് കുമാര്‍ ഗോയല്‍, രോഹിന്റണ്‍ എഫ്. നരിമാന്‍ എന്നിവരുടെ ബെഞ്ച് വിദേശ അഭിഭാഷകര്‍ക്ക് നിശ്ചിത കാലത്തേക്ക് ഇന്ത്യയിലെത്തി നിയമോപദേശം നല്‍കാമെന്ന 2012ലെ മദ്രാസ് ഹൈക്കോടതി വിധി ഭാഗികമായി അംഗീകരിക്കുകയായിരുന്നു. അന്താരാഷ്ട്ര വ്യാപാര തര്‍ക്കങ്ങളില്‍ വിദേശ അഭിഭാഷകര്‍ ഇന്ത്യയിലെത്തുന്നത് തടയാനാകില്ലെന്ന് കോടതി വ്യക്തമാക്കി.
എന്നാല്‍, അവര്‍ക്ക് ഇന്ത്യയിലെ നിയമവൃത്തിയുടെ പെരുമാറ്റച്ചട്ടം ബാധകമായിരിക്കും. മദ്രാസ് ഹൈകോടതി വിധിക്കെതിരെ ബാര്‍ കൗണ്‍സില്‍ ഓഫ് ഇന്ത്യ നല്‍കിയ അപ്പീലിലാണ് സുപ്രീംകോടതി ഉത്തരവുണ്ടായത്. കേസില്‍,യു.കെ, യു.എസ്.എ, ഫ്രാന്‍സ്, ആസ്‌ട്രേലിയ തുടങ്ങിയ രാജ്യങ്ങളില്‍നിന്നുള്ള 30ഓളം നിയമ സ്ഥാപനങ്ങളുടെ വാദവും കോടതി പരിഗണിച്ചു.
https://www.facebook.com/Malayalivartha
