അപകടങ്ങളിൽ നിന്നും തലയെ സംരക്ഷിക്കുവാനുപയോഗിക്കുന്ന കവചമാണ് ഹെൽമറ്റ്. ഇരുചക്രവാഹങ്ങളിൽ യാത്ര ചെയ്യുന്നവർ നിർബന്ധമായും ഇത് വച്ചിരിക്കണം. ഇരുചക്രവാഹനയാത്രാ ഹെൽമറ്റുകളിൽ ഉള്ളിൽ തെർമോക്കോൾ, തുണി എന്നിവ ഉപയോഗിച്ചിരിക്കുന്നു. വീഴ്ച്ചയിൽ തലയ്ക്കുണ്ടാകുന്ന ആഘാതം കുറയ്ക്കുവാനായാണ് തെർമോക്കോൾ ഘടിപ്പിച്ചിരിക്കുന്നത്. എന്നാൽ ഇന്ന് പലരും ഹെൽമെറ്റ് ഉപയോഗിക്കുന്നത് പോലീസ് ചെക്കിങ്ങിൽനിന്നും രക്ഷപ്പെടാൻ മാത്രമാണ്. അതുകൊണ്ടുതന്നെ പൊതുനിരത്തുകളിൽനിന്നും മറ്റും ലഭിക്കുന്ന നിലവാരമില്ലാത്ത ഹെൽമെറ്റാണ് വാങ്ങി ഉപയോഗിക്കുന്നത്. എന്നാൽ ഇനിമുതൽ ഇത്തരത്തിൽ നിലവാരമില്ലാത്ത ഹെൽമെറ്റ് ഉപയോഗിക്കാൻ കഴിയില്ല. ഐ എസ് ഐ മുദ്രയില്ലാത്ത ഹെൽമറ്റുകൾ രാജ്യത്ത് നിരോധിക്കുകയാണ്.

ആറു മാസത്തിനകം ഇത്തരം ഹെൽമറ്റുകളുടെ വിൽപ്പന രാജ്യവ്യാപകമായി വിലക്കുമെന്ന് ബ്യൂറോ ഓഫ് ഇന്ത്യൻ സ്റ്റാൻഡേഡ്സ് സുപ്രീം കോടതിയുടെ റോഡ് സുരക്ഷാ പാനലിനെ അറിയിച്ചു. രാജ്യത്തെ ഇരുചക്രവാഹന യാത്രികർ ഉപയോഗിക്കുന്ന ഹെൽമറ്റുകളിൽ 75 മുതൽ 80% വരെ ഗുണനിലവാരമില്ലാത്തവയും ഐ എസ് ഐ മുദ്രയില്ലാത്തവയുമാണെന്നുമാണ് റിപ്പോര്‍ട്ടുകള്‍. കുറഞ്ഞു വിലയ്ക്കു ലഭിക്കുമെന്നതിനാൽ സുരക്ഷ അവഗണിച്ചും പലരും ഇത്തരം ഗുണനിലവാരം കുറഞ്ഞ ഹെൽമറ്റുകളാണ് ഉപയോഗിക്കുന്നതെന്നാണ് ഈ രംഗത്തെ വിദഗ്ധര്‍ പറയുന്നത്. തീരുമാനത്തെ ഐ എസ് ഐ മുദ്രയുള്ള ഹെല്‍മറ്റ് നിര്‍മ്മാതാക്കളുടെ അസോസിയേഷന്‍ സ്വാഗതം ചെയ്തു. റോഡ് അപകടങ്ങളും മരണങ്ങളും കുറയ്ക്കാനുള്ള നടപടികളുടെ ഭാഗമായിട്ടാണ് ഹെൽമറ്റുകൾക്ക് ബി ഐ എസ് നിലവാരം കർശനമാക്കാനുള്ള തീരുമാനം.