ഓരോ വർഷവും ഇന്ത്യക്കാർ കൂടുതൽ ദുഃഖിക്കുകയാണ്. ഐക്യരാഷ്ട്ര സംഘടന പുറത്തിറക്കിയ 2018ലെ ലോക സന്തോഷ സൂചികയിലാണ് ഇക്കാര്യം പുറത്തുവന്നിരിക്കുന്നത്. 2017 ലെ പട്ടികയില്‍ ഇന്ത്യയുടെ സ്ഥാനം 122 ആയിരുന്നു. എന്നാൽ ഇപ്പോൾ അതിൽനിന്നും 11 സ്ഥാനം പിന്നോട്ടു പോയിരിക്കുകയാണ് 2018ൽ. 2016 ല്‍ 118-ാം സ്ഥാനത്തായിരുന്നു ഇന്ത്യ. ഓരോ വര്‍ഷവും പട്ടികയില്‍ പിന്നിലേക്ക് പോവുകയാണ് ഇന്ത്യ. എന്നാൽ പാക്കിസ്ഥാനാകട്ടെ ഓരോ വർഷവും മുന്നിലും. പ്രതിശീര്‍ഷ ജി ഡി പി, സാമൂഹിക പിന്തുണ, ആയുര്‍ദൈര്‍ഘ്യം, സാമൂഹിക സ്വാതന്ത്ര്യം, ദാനശീലം, അഴിമതിയുടെ അഭാവം തുടങ്ങിയവയുടെ അടിസ്ഥാനത്തിലാണ് രാജ്യങ്ങളെ ക്രമപ്പെടുത്തിയിട്ടുള്ളത്.

യു എന്‍ സസ്റ്റെയിനബിള്‍ ഡെവലപ്മെന്റ് സൊല്യൂഷന്‍ നെറ്റ്വര്‍ക്കാണ് പട്ടിക തയ്യാറാക്കിയിരിക്കുന്നത്. 156 രാജ്യങ്ങളുടെ പട്ടികയില്‍ 133-ാം സ്ഥാനമാണ് ഇന്ത്യക്ക്. പാകിസ്താനും നേപ്പാളിനും പിന്നിലാണ് ഇന്ത്യയുടെ സ്ഥാനം. പട്ടികയില്‍ ഒന്നാം സ്ഥാനത്ത് നിൽക്കുന്നത് ഫിന്‍ലന്‍ഡാണ്. 75-ാം സ്ഥാനത്താണ് പാകിസ്താന്‍. നേപ്പാള്‍ 101-ാം സ്ഥാനത്തും ഭൂട്ടാന്‍ 97-ാം സ്ഥാനത്തുമുണ്ട്. 115-ാം സ്ഥാനത്ത് ബംഗ്ലാദേശും 116-ാം സ്ഥാനത്ത് ശ്രീലങ്കയുമാണ്. ആഫ്രിക്കന്‍ രാജ്യമായ ബുറുണ്ടി 156-ാം സ്ഥാനത്താണ്.