അവകാശികളില്ലാതെ ഇന്ത്യയിലെ ബാങ്കുകളിൽ കിടക്കുന്നത് കോടിക്കണക്കിന് രൂപയാണ്. റിസര്‍വ്വ് ബാങ്ക് അധികൃതർ ഇതു സംബന്ധിച്ച കണക്കുകള്‍ പുറത്തുവിട്ടിരുന്നു. ഇതനുസരിച്ച് ഇന്ത്യയിലെ ബാങ്കുകളിൽ അവകാശികളില്ലാതെ കിടക്കുന്നത് 11,302 കോടി രൂപയാണ്. എസ്ബിഐയിലാണ് ഏറ്റവും കൂടുതല്‍ പണം അവകാശികളില്ലാതെ കിടക്കുന്നത്. ഇവിടെ 1262 കോടി രൂപയാണ് ഇത്തരത്തിലുള്ളത്. എസ്ബിഐ കഴിഞ്ഞാൽ ഏറ്റവും കൂടുതൽ പണമുള്ളത് പഞ്ചാബ് നാഷണല്‍ ബാങ്കിലാണ്. 1250 കോടി രൂപയാണ് ഇവിടെയുള്ളത്.

മറ്റ് ബാങ്കുകളില്‍ 7040 കോടി രൂപയാണ് അവകാശികളില്ലാതെ കിടക്കുന്നത്. എച്ച്‌ഡിഎഫ്സി, ആക്സിസ് ബാങ്ക്, കോട്ടക് മഹീന്ദ്ര തുടങ്ങിയ സ്വകാര്യ ബാങ്കുകളിലും 1416 കോടി രൂപ അവകാശികളില്ലാതെ കിടക്കുന്നുണ്ട്. ഇപ്പോൾ അവകാശികളില്ലാത്തതായി കണക്കുകൂട്ടിയിരിക്കുന്ന അക്കൗണ്ടുകളുടെ ഉടമകള്‍ എപ്പോഴെങ്കിലും പണത്തിന് അവകാശ വാദം ഉന്നയിക്കുകയാണെങ്കിൽ അത് കിട്ടുമെന്ന് റിസര്‍വ്വ് ബാങ്ക് അധികൃതര്‍ വ്യക്തമാക്കിയിട്ടുണ്ട്. പത്ത് വര്‍ഷത്തിൽ കൂടുതൽ ഉടമകളെത്താത്ത അക്കൗണ്ടുകളിലുള്ള തുകയാണ് അവകാശികളില്ലാത്ത പണമായി ബാങ്ക് കണക്കാക്കുന്നത്. സാധാരണയായി ഉടമകള്‍ മരിച്ചുപോകുകയോ മറ്റ് നോമിനികള്‍ ഇല്ലാതിരിക്കുകയോ ചെയ്യുമ്പോഴാണ് ഇങ്ങനെ അവകാശികളില്ലാതാകുന്നത്. ഒന്നില്‍ കൂടുതല്‍ അക്കൗണ്ടുകള്‍ ഉള്ളവര്‍ പണം നിക്ഷേപിച്ച ശേഷം പിന്നീട് അന്വേഷിക്കാതിരിക്കുമ്പോഴും ഇങ്ങനെ അവകാശികളില്ലാത്ത പണം കണക്കുകൂട്ടുന്നു.