കേന്ദ്രത്തിനെതിരെ ആഞ്ഞടിച്ച്‌ കോണ്‍ഗ്രസ്. വിദേശനയത്തില്‍ പ്രധാനമന്ത്രി നരേന്ദ്ര മോദിക്ക് വ്യക്തിപരമായ താല്‍പര്യങ്ങളെന്ന് കോണ്‍ഗ്രസ്. വിദേശ നയത്തില്‍ രാജ്യത്തിന് വ്യക്തമായ രൂപരേഖയില്ലെന്നും കോണ്‍ഗ്രസ് പ്ലീനറി സമ്മേളനത്തിലെ പ്രമേയം ചൂണ്ടിക്കാട്ടി.

അയല്‍ രാജ്യങ്ങളുമായുള്ള ബന്ധം ഏറ്റവും മോശമായ അവസ്ഥയിലാണ്. പാക്കിസ്ഥാനുമായുള്ള തര്‍ക്കം കേന്ദ്രസര്‍ക്കാര്‍ വിഭജന വിഷയമാക്കിയത് വലിയ തിരിച്ചടിയാണെന്നും പ്രമേയത്തില്‍ പറയുന്നു. കശ്മീരിലെ സ്ഥിതി ദിനംപ്രതി വഷളായിക്കൊണ്ടിരിക്കുകയാണെന്നും, സര്‍ക്കാരിന്റെ പിടിപ്പുകേടാണിതെന്നും മുന്‍ പ്രധാനമന്ത്രി മന്‍മോഹന്‍ സിങ് ആഞ്ഞടിച്ചു.

കേന്ദ്രസര്‍ക്കാരിനെതിരെ രൂക്ഷ വിമര്‍ശനങ്ങളാണ് പ്ലീനറി സമ്മേളനത്തിന്റെ ആദ്യ ദിവസമുണ്ടായത്. രാജ്യത്തെ ഭിന്നിപ്പിക്കുന്ന രാഷ്ട്രീയത്തിന് ബിജെപി ഊന്നല്‍ നല്‍കുന്നതിനാല്‍ കാര്‍ഷിക ദുരവസ്ഥയും തൊഴിലില്ലായ്മയും അടക്കമുള്ള മുഖ്യപ്രശ്നങ്ങളില്‍ ശ്രദ്ധ ചെലുത്താന്‍ കേന്ദ്രസര്‍ക്കാരിനു കഴിയുന്നില്ലെന്നും ബിജെപി വെറുപ്പിന്റെ ഭാഷ ഉപയോഗിക്കുന്നുവെന്നും സമ്മേളനത്തിലെ രാഷ്ര്ടീയ പ്രമേയം ചൂണ്ടിക്കാട്ടിയിരുന്നു.