കോണ്ഗ്രസിനെ സമൂലമായി ഉടച്ചു വാര്ക്കാന് രാഹുല്ഗാന്ധി
കോണ്ഗ്രസില് സാധാരണക്കാരെയും യുവാക്കളെയും അകറ്റി നിറുത്തുന്ന മതില്ക്കെട്ടുകള് പൊളിക്കുമെന്ന് എ.ഐ.സി.സി പ്ലീനറി സമ്മേളനത്തില് പാര്ട്ടി അദ്ധ്യക്ഷ സ്ഥാനം ഔദ്യോഗികമായി ഏറ്റെടുത്ത രാഹുല് ഗാന്ധി വ്യക്തമാക്കി. പാര്ട്ടിക്കുള്ളില് നേതാക്കള്ക്കും പ്രവര്ത്തകര്ക്കുമിടയിലെ അതിര്വരമ്പുകള് പൊളിക്കലാണ് ആദ്യ ജോലി. തുടര്ന്ന്, യുവാക്കളെ പാര്ട്ടിയില് നിന്നകറ്റുന്ന രാഷ്ട്രീയ മതിലും . പാരച്യൂട്ടില് വരുന്നവരും പണക്കാരും അദ്ധ്വാനിക്കുന്ന പ്രവര്ത്തകരെ മറി കടക്കുന്ന പതിവ് ഇനിയുണ്ടാവില്ല. പാര്ട്ടിയെ സ്നേഹിക്കുന്നവര്ക്ക് ടിക്കറ്റ് ലഭിക്കും. ഒരു പാര്ട്ടി നേതൃത്വവും സമ്മേളന വേദിയില് ഇരിപ്പിടം ഒഴിവാക്കാറില്ല.
കോണ്ഗ്രസ് പ്ളീനറി സമ്മേളനത്തില് വേദി ഒഴിച്ചിട്ടത് കഴിവുള്ള യുവാക്കളെ ഇരുത്താനാണ്. ഇന്ത്യയെ മാറ്റാന് യുവാക്കളുടെ ശക്തി വേണം. കഴിവും കഠിനാദ്ധ്വാനവും ആത്മാര്ത്ഥയുമുള്ളവര്ക്ക് കടന്നു വരാം. മുതിര്ന്ന നേതാക്കളുടെ ആശീര്വാദത്തോടെയായിരിക്കുമത്.
കഴിഞ്ഞ 15 വര്ഷത്തെ രാഷ്ട്രീയ ജീവിതത്തില് തെറ്റുകളും തിരിച്ചടികളുമുണ്ടായി. വേദനകളില് നിന്ന് ഊര്ജ്ജം ഉള്ക്കൊണ്ടു. ജനങ്ങളുടെ പ്രതീക്ഷ പൂര്ണമായി നിറവേറ്റാന് യു.പി.എ സര്ക്കാരിന് കഴിഞ്ഞില്ല.
ഇക്കഴിഞ്ഞ ഗുജറാത്ത് തിരഞ്ഞെടുപ്പില് , പ്രധാനമന്ത്രി നരേന്ദ്രമോദിക്ക് സീ പ്ളെയിനില് പറക്കേണ്ടി വന്നു. അടുത്ത ഘട്ടത്തില് അദ്ദേഹത്തിന് അന്തര്വാഹിനിയില് മുങ്ങേണ്ടി വരും. ഇപ്പോള് തന്നെ മോദിയില് മാറ്റങ്ങള് കണ്ടു തുടങ്ങി.
ഏറെ പ്രതീക്ഷകളോടെ അധികാരത്തിലേറ്റിയ യുവാക്കളെ കാണാതെയാണ് നീരവ് മോദിയെയും ലളിത് മോദിയെയും കയറ്റി നരേന്ദ്ര മോദി പാഞ്ഞത്. അദ്ദേഹം ജനങ്ങളുടെ അക്കൗണ്ടില് പണമെത്തിച്ചില്ല. മേക്ക് ഇന് ഇന്ത്യയല്ല, വിപണിയില് നിറയെ ചൈനീസ് ഉല്പന്നങ്ങളാണ്.യുവാക്കള്ക്ക് തൊഴിലില്ല. അവരോട് യോഗ ചെയ്യാനാണ് പ്രധാനമന്ത്രിയുടെ ആഹ്വാനം. മറ്റു കാര്യങ്ങളില് മൗനം. കോടികള് കൊള്ളയടിച്ചവരെ സംരക്ഷിക്കും. പ്രധാനമന്ത്രിയുടെ ധാരണ ദൈവത്തിന്റെ അവതാരമാണെന്നാണ്.
ഗുജറാത്ത് തിരഞ്ഞെടുപ്പ് സമയത്ത് എന്റെ ക്ഷേത്ര ദര്ശനത്തെ ബി.ജെ.പി വിവാദമാക്കി. ക്ഷേത്രത്തില് മാത്രമല്ല, പള്ളികളിലും ഗുരുദ്വാരകളിലും പോകാറുണ്ട്. ഈശ്വരനെ നാം ആഗ്രഹിക്കുന്ന സ്ഥലത്ത് കാണാന് പറ്റും. അതേസമയം ,ബി.ജെ.പി ദൈവത്തെപ്പോലും കച്ചവടത്തിനായി ഉപയോഗിക്കുന്നു. ചോദ്യങ്ങളെ അടിച്ചമര്ത്തുന്നവര് മുസ്ളീംങ്ങള് ഇന്നാട്ടുകാരല്ലെന്ന് പറഞ്ഞ് അപമാനിക്കുന്നു.
തമിഴരോട് അവരുടെ മനോഹര ഭാഷ മാറ്റാന് പറയുന്നു. വടക്കു കിഴക്കള്ളവരുടെ ഭക്ഷണ ശീലത്തെ വിമര്ശിക്കുന്നു. കല്ബുര്ഗി, ഗൗരിലങ്കേഷുമാരെ ഇല്ലാതാക്കുന്നു. ഭരണഘടനാ സ്ഥാപനങ്ങളെ തകര്ക്കുന്ന ആര്.എസ്.എസ് നിലപാടുകള് മൂലം ജനങ്ങള് ആശ്രയിക്കുന്ന സുപ്രീംകോടതി ജഡ്ജിമാര് തിരിച്ച് സഹായം അഭ്യര്ത്ഥിക്കേണ്ട ഗതികേടിലാണ്.
സത്യത്തിനു വേണ്ടി നിലകൊണ്ട സൗമ്യരായ പാണ്ഡവരെപ്പോലെയാണ് കോണ്ഗ്രസ്. ബി.ജെ.പി അധികാരത്തിനു വേണ്ടി യുദ്ധം ചെയ്ത കൗരവരെപ്പോലെയും. കൊലക്കേസ് പ്രതിയാണ് ബി.ജെ.പിയുടെ അദ്ധ്യക്ഷന്. ബി.ജെ.പിയില് സംഘടനയാണ് ശബ്ദം. കോണ്ഗ്രസില് ജനങ്ങളാണ് നാവ്.
ബ്രിട്ടീഷ് ജയിലില് യാതന അനുഭവിച്ച ഗാന്ധിജിയും മോചനത്തിന് കത്തെഴുതി യാചിച്ച സര്വര്ക്കറും തമ്മിലുള്ള വ്യത്യാസമുണ്ട് ഇരു പാര്ട്ടികളും തമ്മില്. ജനങ്ങളെ സേവിക്കുന്ന കോണ്ഗ്രസിനെ നിശബ്ദമാക്കാന് ഒരു ശക്തിക്കും കഴിയില്ലെന്നും രാഹുല് ഓര്മ്മിപ്പിച്ചു.
https://www.facebook.com/Malayalivartha
