തന്റെ പ്രണയാഭ്യർത്ഥന നിരസിച്ചതിനെത്തുടർന്ന് 17 കാരന്റെ മുഖത്ത് പെൺകുട്ടി ആസിഡ് ഒഴിച്ച് പൊള്ളിച്ചു. സംഭവത്തിൽ 16കാരിയായ പെൺകുട്ടിയെയും അമ്മയെയും പോലീസ് അറസ്റ്റ് ചെയ്തു. പെൺകുട്ടിക്ക് ആസിഡ് സംഘടിപ്പിച്ചു കൊടുത്തത് അമ്മയാണ്. ബംഗ്ലാദേശിലാണ് സംഭവം നടന്നത്. ധാക്ക സ്വദേശിയായ മഹ്‌മുദുൽ ഹസൻ മറൂഫാണ് ആക്രമണത്തിനിരയായത്. കൂട്ടുകാർക്കൊപ്പം പുറത്തുപോയതിനുശേഷം വീട്ടിലേക്ക് തിരിച്ചുവരുന്നതിനിടെ വഴിയിൽ മഹ്മുദുലിനെ തടഞ്ഞു നിർത്തിയശേഷം പെൺകുട്ടി പ്രണയാഭ്യർത്ഥന നടത്തി. എന്നാൽ നിരസിച്ചതിനെത്തുടർന്ന് പ്രകോപിതയായ പെൺകുട്ടി ആസിഡ് ഒഴിക്കുകയായിരുന്നു. ഏതാനും മാസങ്ങളായി പെൺകുട്ടി പ്രണയാഭ്യർത്ഥനയുമായി ശല്യം ചെയ്യുകയായിരുന്നുവെന്നാണ് പറയുന്നത്.

ആസിഡ് ആക്രമണത്തില്‍ ഗുരുതര പരുക്കേറ്റ മഹ്‌മുദുൽ ഹസൻ മറൂഫിനെ ആശുപത്രിയിൽ പ്രവേശിപ്പിച്ചു. മഹ്‌മുദുലിന്റെ മുഖം മുഴുവൻ പൊളളലേറ്റിട്ടുണ്ട്. വലതുതോളിനും പൊളളലേറ്റിട്ടുണ്ട്. പൊള്ളല്‍ പൂര്‍ണമായും മാറിയാലും പാടുകള്‍ ഉണ്ടാകുമെന്നാണ് ഡോക്ടര്‍മാര്‍ പറയുന്നത്. പെട്ടെന്നുണ്ടായ ആക്രമണത്തെ തുടര്‍ന്നുണ്ടായ മാനസികാഘാതവും മഹ്‍മൂദുലിനെ തളര്‍ത്തിയിട്ടുണ്ട്. മകന് സംഭവിച്ച ദുരിതത്താല്‍ അമ്മയും മനസ്സ് തളര്‍ന്നിരിക്കയാണെന്ന് ഡോക്ടര്‍മാര്‍ പറയുന്നു.