കാശ്മീരിലെ കുപ്‌വാര ജില്ലയില്‍ സൈന്യവും ഭീകരരും തമ്മില്‍ ഇന്നലെയുണ്ടായ ഏറ്റുമുട്ടലില്‍ അഞ്ച് സുരക്ഷാഭടന്മാര്‍ വീരമൃത്യു വരിച്ചു. മറ്റൊരു സുരക്ഷാ ഉദ്യോഗസ്ഥന് പരിക്കേറ്റു. അഞ്ചു ഭീകരരും കൊല്ലപ്പെട്ടു. കുപ്‌വാര ജില്ലയിലെ ആരംപോരയില്‍ ഹല്‍മത്പുര മേഖലയില്‍ ആര്‍മി പട്രോളിംഗിനിടെ കാടിനുള്ളില്‍ ഒളിച്ചിരുന്ന ഭീകരര്‍ നടത്തിയ വെടിവയ്പിനെ തുടര്‍ന്ന് ചൊവ്വാഴ്ചയാണ് മേഖലയില്‍ സംഘര്‍ഷാവസ്ഥ ഉടലെടുത്തത്.

സൈന്യം നടത്തിയ പ്രത്യാക്രമണത്തിലാണ് ഭീകരര്‍ കൊല്ലപ്പെട്ടത്. കഴിഞ്ഞ 32 മണിക്കൂറുകളായി പ്രദേശത്ത് നടക്കുന്ന വെടിവയ്പ് രാത്രിവൈകിയും തുടരുന്നതായാണ് റിപ്പോര്‍ട്ടുകള്‍. നിയന്ത്രണരേഖയോട് ചേര്‍ന്നുള്ള അവസാന ഗ്രാമമാണ് ഹല്‍മത്പുര. അഞ്ചു ഭീകരരില്‍ മൂന്ന് പേര്‍ ചൊവ്വാഴ്ച നടന്ന വെടിവയ്പിലും രണ്ടുപേര്‍ ഇന്നലെ നടന്ന വെടിവയ്പിലുമാണ് കൊല്ലപ്പെട്ടത്. ഒരു ഭീകരന്‍ കൂടി ഒളിച്ചിരിക്കുന്നതായാണ് പൊലീസ് വൃത്തങ്ങള്‍ നല്‍കുന്ന സൂചന.