ആന്ധ്രാപ്രദേശില്‍ സംസ്ഥാനത്തിനു പ്രത്യേക പദവിയെന്ന ആവശ്യം ഉന്നയിച്ച് ഇടതു പാര്‍ട്ടികള്‍ ആഹ്വാനം ചെയ്ത ബന്ദ് ആരംഭിച്ചു. രാവിലെ 10 മുതല്‍ ഉച്ചയ്ക്ക് രണ്ടുവരെയാണ് ബന്ദ്. പാര്‍ട്ടി പ്രവര്‍ത്തകര്‍ സംസ്ഥാന വ്യാപകമായി ദേശീയ പാതകള്‍ ഉപരോധിച്ചു.

ഭരണകക്ഷിയായ തെലുങ്ക് ദേശം പാര്‍ട്ടിയും പ്രതിപക്ഷ കക്ഷികളായ വൈഎസ്ആര്‍ കോണ്‍ഗ്രസും ജനസേന പാര്‍ട്ടിയും ബന്ദിനു പിന്തുണ പ്രഖ്യാപിച്ചിട്ടുണ്ട്.

പ്രതിഷേധത്തിന്റെ ഭാഗമായി എല്ലാ സര്‍ക്കാര്‍ ജീവനക്കാരും കറുത്ത ബാഡ്ജ് ധരിച്ച് ജോലിക്കെത്തണമെന്ന് ടിഡിപി ആഹ്വാനം ചെയ്തു. സംസ്ഥാനത്ത് ബന്ദ് ഏതാണ്ട് പൂര്‍ണമാണ്. വാഹന ഗതാഗതം നിശ്ചലമായി. ഇരുചക്രവാഹനങ്ങള്‍ അടക്കം വാഹനങ്ങള്‍ നിരത്തിലിറങ്ങിയില്ല. കടകമ്പോളങ്ങള്‍ അടഞ്ഞുകിടന്നു. പാര്‍ലമെന്റില്‍ പ്രക്ഷോഭം നടത്തുന്ന എംപിമാര്‍ക്ക് ഐക്യദാര്‍ഢ്യവുമായി തെലുങ്കുദേശം പാര്‍ട്ടി റാലി നടത്തി.