ഇന്റർനെറ്റ് വഴി ക്രിക്കറ്റ് കാണുന്ന ക്രിക്കറ്റ് പ്രേമികൾക്ക് സന്തോഷവാർത്തയുമായി എത്തിയിരിക്കുകയാണ് ബിസിസിഐ. ഇനിമുതല്‍ ടെലിവിഷനില്‍ സംപ്രേക്ഷണം തുടങ്ങുന്ന അതേ സമയത്തുതന്നെ ഇന്റർനെറ്റ് ബ്രോഡ്കാസ്റ്റ് തുടങ്ങുമെന്നാണ് ബിസിസിഐ അറിയിച്ചിരിക്കുന്നത്. ഇങ്ങനെ ചെയ്യുന്നത് വഴി ഇന്ത്യയുടെ മത്സരങ്ങള്‍ സമയം നഷ്ടപ്പെടുത്താതെ ക്രിക്കറ്റ് പ്രേമികൾക്ക് കാണാനാകും. ഇപ്പോൾ ടെലിവിഷനില്‍ സംപ്രേക്ഷണം തുടങ്ങുന്നതിനേക്കാൾ അഞ്ച് മിനിറ്റ് വൈകിയാണ് ഓണ്‍ലൈനില്‍ മത്സരങ്ങള്‍ സംപ്രേക്ഷണം ചെയ്യുന്നത്.

പുതിയ തീരുമാനം ഡിജിറ്റല്‍ മാധ്യമങ്ങള്‍ക്കും സാമ്പത്തികമായി ബിസിസിഐയ്ക്കും മുതല്‍ക്കൂട്ടാകുമെന്നാണ് ഇവരുടെ പ്രതീക്ഷ. ഏപ്രില്‍ ആറിന് ഡിജിറ്റല്‍ സംപ്രേക്ഷണാവകാശത്തിനായി നടക്കുന്ന ഏഴ് കോടി രൂപ വിലയുള്ള ലേലത്തിനായി ഗൂഗിള്‍, ഫേസ്ബുക്ക്, ജിയോ അടക്കമുള്ള ആറ് വന്‍കിട കമ്പനികളാണ് രംഗത്തുള്ളത്.