ചെന്നൈയില്‍ ഡിജിപി ഓഫീസിന് മുന്നില്‍ രണ്ട് പോലീസുകാര്‍ ആത്മഹത്യക്ക് ശ്രമിച്ചു. യൂണിഫോമില്‍ എത്തിയ ഇവര്‍ ശരീരത്തില്‍ മണ്ണെണ്ണ ഒഴിച്ച് കത്തിക്കുവാന്‍ ശ്രമിക്കുകയായിരുന്നു. ഒപ്പമുണ്ടായിരുന്ന പോലീസുകാരുടെ സമയോചിതമായ ഇടപെടൽ കാരണം ശ്രമം പരാജയപെട്ടു.

ഡിജിപി ഓഫീസിന് പുറത്തു നിന്നപ്പോള്‍ പോലീസുകാര്‍ക്കൊപ്പം നിന്നിരുന്ന രണ്ടു പേരാണ് കൈയ്യില്‍ കരുതിയിരുന്ന മണ്ണെണ്ണ ദേഹത്തേക്ക് ഒഴിച്ചത്. തേനി സ്വദേശികളായ രഘു, ഗണേഷ് എന്നീ പോലീസുകാരാണ് ഇത്തരത്തില്‍ ഒരു ശ്രമം നടത്തിയതെന്ന് പ്രദേശിക മാധ്യമങ്ങള്‍ റിപ്പോര്‍ട്ട് ചെയ്തു. ഒപ്പം നിന്നിരുന്ന പോലീസ് ഉദ്യോഗസ്ഥര്‍ ആണ് ഇവരുടെ ദേഹത്ത് വെള്ളം ഒഴിച്ച് അപകടത്തില്‍ നിന്നും രക്ഷിച്ചത്. ബുധനാഴ്ചയാണ് ഡിജിപി ഓഫീസിന് മുന്നിലാണ് ഇത്തരം സംഭവം അരങ്ങേറിയത്.

മേലുദ്യോഗസ്ഥര്‍ ജാതി പറഞ്ഞ് അധിക്ഷേപിക്കുന്നുവെന്ന് പരാതി പറയുന്നതിനാണ് ഇരുവരും ഡിജിപി ഓഫീസില്‍ എത്തിയത്. പരാതി നല്‍കി തിരികെ എത്തിയ ശേഷമായിരുന്നു ആത്മഹത്യാ ശ്രമം നടത്തിയത്. സംഭവത്തില്‍ ചെന്നൈ മൈലാപൂര്‍ പോലീസ് ഇരുവരേയും ചോദ്യം ചെയ്തു.

നേരത്തെ മുന്‍ മുഖ്യമന്ത്രി ജയലളിതയുടെ ശവകുടീരത്തില്‍ ഡ്യൂട്ടിക്ക് നിന്നിരുന്ന അരുണ്‍ രാജ് എന്ന കോണ്‍സ്റ്റബിള്‍ സ്വയം വെടിയുതിര്‍ത്ത് ആത്മഹത്യ ചെയ്തിരുന്നു.