രജനീകാന്തിനും കമലാഹാസനും പിന്നാലെ വിജയ്‌യും രാഷ്ട്രീയത്തിലേക്കെന്ന് സൂചന. ദക്ഷിണേന്ത്യയില്‍ മുഴുവന്‍ താരത്തിന് വലിയ ആരാധകവൃന്ദമാണുളളത്. ഇവരെ ഒരുമിപ്പിക്കാനായി മക്കള്‍ ഇയക്കം എന്ന സംഘടന പുനരുജ്ജീവിപ്പിച്ച് പുതിയ വെബ്‌സൈറ്റ് താരം തുടങ്ങുന്നു. ആരാധകരെ ഒരു കുടക്കീഴില്‍ കൊണ്ടുവരുകയാണ് ലക്ഷ്യം. കമലാഹാസനും രജനീകാന്തിനും ഉള്ള ആരാധകവൃന്ദം ഇളയദളപതിക്കും ഉണ്ട്. രാഷ്ട്രീയത്തിലേക്ക് ഇറങ്ങില്ലെന്ന് മുമ്പ് താരം വ്യക്തമാക്കിയിരുന്നെങ്കിലും തമിഴ്‌നാട്ടിലെ ഇപ്പോഴത്തെ അവസ്ഥ അനുസരിച്ച് എന്തും സംഭവിക്കാമെന്ന് രാഷ്ട്രീയ നിരീക്ഷകര്‍ വിലയിരുത്തി. രജനിയും കമലും പാര്‍ട്ടികള്‍ ആരംഭിച്ചത് ഡി.എം.കെയ്ക്കും എ.ഐ.ഡി.എം.കെയ്ക്കും ആശങ്കയുണ്ടാക്കുന്നുണ്ട്.

മുമ്പ് കോണ്‍ഗ്രസിന് ശക്തമായ വേരോട്ടം ഉണ്ടായിരുന്നു തമിഴ്‌നാട്ടില്‍. പിന്നീട് ദ്രാവിഡ കക്ഷികളുടെ വരവോടെ കോണ്‍ഗ്രസ് ദുര്‍ബലമായി. രജനിയും കമലും രാഷ്ട്രീയത്തിലിറങ്ങിയ സ്ഥിതിക്ക് വിജയ്, അജിത് എന്നിവരില്‍ ആരെയെങ്കിലും കോണ്‍ഗ്രസിലെത്തിച്ച് പാര്‍ട്ടിയെ ശക്തിപ്പെടുത്താനും നീക്കം നടക്കുന്നുണ്ട്. രാഹുല്‍ഗാന്ധിയുമായി കോണ്‍ഗ്രസ് നേതാവും നടിയുമായ ഖുശ്ബു അടക്കമുള്ളവര്‍ ഇത് സംബന്ധിച്ച് ആശയവിനിമയം നടത്തി. എന്നാലിത് എത്രത്തോളം ഫലപ്രദമാകുമെന്ന് അറിയില്ല. ജയലളിത മരിക്കും മുമ്പ് അജിതിനെ എ.ഐ.ഡി.എം.കെയില്‍ എത്തിക്കാന്‍ ആലോചിച്ചിരുന്നു. അതിനിടെയാണ് ജയലളിത ആശുപത്രിയിലായത്.