വിദ്യാഭ്യാസത്തിന് പ്രായപരിധിയില്ലെന്നു തെളിയിച്ചിരിക്കുകയാണ് പഞ്ചാബ് ലുധിയാനയിലെ രജനി ബാല. ജീവിതസാഹചര്യങ്ങള്‍മൂലം 29 വര്‍ഷം മുന്‍പ് ഉപേക്ഷിച്ച പത്താം ക്ലാസ് പഠനത്തിനായി തന്റെ മകനൊപ്പമാണ് രജനി വീണ്ടും പുസ്തകങ്ങള്‍ കൈയിലേന്തിയത്.

മകനോടൊപ്പം ലുധിയാനയിലെ സ്‌കൂളിലെത്തി രജനി പത്താം ക്ലാസ് പരീക്ഷ എഴുതി ഫലത്തിനായി കാത്തിരിക്കുകയാണ്. 44 വയസുള്ള രജനി 1989ലാണ് ഒന്‍പതാം ക്ലാസ് വിദ്യാഭ്യാസം പൂര്‍ത്തിയാക്കിയത്. പിന്നിട് വിവാഹിതയായ രജനിക്കു തുടര്‍ന്നു പഠിക്കാന്‍ സാധിച്ചിരുന്നില്ല. താന്‍ ഇപ്പോള്‍ സിവില്‍ ആശുപത്രിയിലെ ജീവനക്കാരിയാണെന്നും ഇപ്പോഴത്തെ സാഹചര്യത്തില്‍ പത്താം ക്ലാസ് പഠനം പൂര്‍ത്തിയാക്കേണ്ടത് ആവശ്യമാണെന്ന് മനസിലാക്കിയതോടെയാണ് വീണ്ടും പഠിക്കാന്‍ തീരുമാനിച്ചതെന്നും രജനി പറഞ്ഞു. 

തന്റെ മകന്‍ പത്താം ക്ലാസിലായിരുന്നുവെന്നും അവനോടൊപ്പമാണ് പഠിച്ചതെന്നും അവര്‍ പറഞ്ഞു. കുടുംബത്തിലെ എല്ലാവരും തനിക്ക് പൂര്‍ണ പിന്തുണ നല്‍കിയെന്നും തന്റെ മകള്‍ പഠനത്തിനായി സഹായിച്ചുവെന്നും രജനി പറഞ്ഞു.