രാജ്യസഭാ അംഗത്വ കാലാവധി അവസാനിക്കുന്ന കോണ്‍ഗ്രസ് എംപി രേണുകാ ചൗധരിക്ക് വെങ്കയ്യാ നായിഡുവിന്റെ ഉപദേശം. സ്വന്തം ഭാരം കുറച്ച്‌ കോണ്‍ഗ്രസ് പാര്‍ട്ടിയുടെ ഭാരം ഉയര്‍ത്താനാണ് രാജ്യസഭാംഗം രേണുകാ ചൗധരിക്ക് സഭാ ചെയര്‍മാന്‍ വെങ്കയ്യാ നായിഡുവിന്റെ ഉപദേശം. കഴിഞ്ഞ ദിവസം സഭയില്‍ നടന്ന വിടവാങ്ങല്‍ പ്രസംഗത്തിനിടെയായിരുന്നു ഉപരാഷ്ട്രപതിയുടെ ഉപദേശം.

രേണുകാ ചൗധരിയുടെ കാലാവധി ഉടന്‍ അവസാനിക്കുകയാണ്. ഈ സാഹചര്യത്തിലായിരുന്നു വിടവാങ്ങല്‍ പ്രസംഗം സംഘടിപ്പിച്ചത്. പ്രസംഗത്തിനിടയില്‍ രേണുക തന്റെ ഭാരത്തെ കുറിച്ച്‌ സൂചിപ്പിച്ചു. എനിക്ക് ഇതിലും വണ്ണം ഉള്ളപ്പോള്‍ മുതല്‍ വെങ്കയ്യ നായിഡുവിന് എന്നെ അറിയാം. നിരവധി ആളുകള്‍ എന്റെ വണ്ണത്തില്‍ ആശങ്കപ്പെടുന്നുണ്ട്. ഈ ജോലിയില്‍ നമ്മള്‍ ഭാരം ഉപേക്ഷിക്കേണ്ടതുണ്ട്. രേണുക പറഞ്ഞു. ഇതിന് മറുപടിയായാണ് വെങ്കയ്യ ഉപദേശം നല്‍കിയത്.

''വളരെ ലളിതമായ ഒരു നിര്‍ദേശമാണ് എനിക്കുള്ളത്. നിങ്ങളുടെ ഭാരം കുറച്ച്‌ പാര്‍ട്ടിയുടെ ഭാരം വര്‍ധിപ്പിക്കാനുള്ള ശ്രമങ്ങള്‍ നടത്തു''. എന്നായിരുന്നു ഉപദേശം.

രാജ്യസഭയിലെ ഡെപ്യൂട്ടി ചെയര്‍മാന്‍ സ്ഥാനത്തേക്ക് നജ്മ ഹെപ്ത്തുള്ളയ്ക്കെതിരെ പ്രതിപക്ഷപാര്‍ട്ടികളുടെ സംയുക്തസ്ഥാനാര്‍ത്ഥിയാകാന്‍ തനിക്ക് ഭാഗ്യം ലഭിച്ചിരുന്നെന്ന് രേണുക പറഞ്ഞു. നിലവില്‍ രാജ്യസഭയിലെ വനിതാ പ്രാതിനിധ്യം വെറും 11 ശതമാനം മാത്രമാണെന്നും അത് വര്‍ധിപ്പിക്കേണ്ടതുണ്ടെന്നും രേണുക അഭിപ്രായപ്പെട്ടു.