വീഡിയോകോണിന് ഐസിഐസിഐ ബാങ്ക് വായ്പ നല്‍കിയതുമായി ബന്ധപ്പെട്ട വിവാദത്തില്‍ ചന്ദ കൊച്ചാറിനെതിരെ അന്വേഷണം തുടങ്ങി. ബാങ്ക് സിഇഒ ചന്ദ കൊച്ചാറിനും ഭര്‍ത്താവ് ദീപക് കൊച്ചാറിനുമെതിരേയുമാണ് പ്രാഥമിക അന്വേഷണം.

വീഡിയോകോണിന് 3,250 കോടിയുടെ വായ്പ നല്‍കിയതുമായി ബന്ധപ്പെട്ട് നിയമവിരുദ്ധം ഉണ്ടോ എന്ന് അന്വേഷിക്കും. വീഡിയോകോണിന് വായ്പ നല്‍കാനുള്ള തീരുമാനത്തിന് പിന്നില്‍ ചന്ദ കോച്ചാറാണെന്ന് ബാങ്ക് ചെയര്‍മാന്‍ എം.കെ. ശര്‍മ വെളിപ്പെടുത്തല്‍ നടത്തിയിരുന്നു. പൊതുമേഖല ബാങ്കുകളിലെ വായ്പ തട്ടിപ്പിന് പിന്നാലെയാണ് ഐസിഐസിഐ ബാങ്കിലും ക്രമക്കേട് നടന്നതായി ആരോപണം ഉയര്‍ന്നത്.

വിചാരണ നടത്താന്‍ ആവശ്യമായ തെളിവുകളുമുണ്ടോ എന്നാണ് സിബിഐ പ്രധാനമായും അന്വേഷിച്ച വരുന്നത്. ചന്ദാ കൊച്ചാറും ഭര്‍ത്താവും തമ്മിലുള്ള കൂട്ടുകച്ചവടത്തിന്റെ ഭാഗമാണ് വായ്പയെന്ന് കഴിഞ്ഞ ദിവസം ഇന്ത്യന്‍ എക്‌സ്പ്രസ് പത്രം റിപ്പോര്‍ട്ട് ചെയ്തിരുന്നു. എന്നാല്‍ വായ്പയില്‍ അസ്വാഭാവികയൊന്നുമില്ലെന്നാണ് ഐസിഐസിഐ ബാങ്കിന്റെ വിശദീകരണം.