നിരാഹാര സമരത്തിനിടയിൽ പ്രധാനമന്ത്രിയുടെ ഭക്ഷണ മെനു പുറത്തായതിനു പിന്നാലെ എംഎല്‍എമാര്‍ ഭക്ഷണം ക‍ഴിക്കുന്ന ദൃശ്യങ്ങളും പുറത്ത്. പ്രതിപക്ഷം പാര്‍ലമെന്റ് സ്തംഭിപ്പിച്ചതില്‍ പ്രതിഷേധിച്ച് പ്രധാനമന്ത്രി നരേന്ദ്ര മോദിയുടെ നേതൃത്വത്തില്‍ ബിജെപി വ്യാഴാഴ്ച സങ്കടിപ്പിച്ച നിരാഹാരത്തിനിടയിൽ ഭക്ഷണം കഴിക്കുന്ന ദൃശ്യമാണ് പുറത്ത് വന്നത്. എംഎല്‍എമാരായ ഭീംറാവു താപ്കിര്‍, സഞ്ജയ് ഭെഗഡെ എന്നിവരാണ് ഉപവാസ ദിനത്തില്‍ സാന്‍ഡ്വിച്ചും ചിപ്‌സു ക‍ഴിച്ച്‌ ശ്രദ്ധേയമായത്.

സമരത്തിന് മുന്നോടിയായി ബിജെപി എംപിമാര്‍ക്കും പ്രവര്‍ത്തകര്‍ക്കും നേതൃത്വം കര്‍ശന നിർദ്ദേശങ്ങൾ ഏര്‍പ്പെടുത്തിയിരുന്നു. ബിജെപി പ്രവർത്തകർ പൊതുസ്ഥലങ്ങളില്‍ വെച്ചോ ക്യാമറ നിരീക്ഷണത്തിനു പരുതിയിലോ ഭക്ഷണം കഴിക്കുന്നത്‌ ഒഴിവാക്കണമെന്നു നിർദ്ദേശിച്ചിരുന്നു. സമരത്തിന് ചീത്തപ്പേര് ഉണ്ടാക്കുന്ന തരത്തിൽ പ്രവർത്തിക്കരുതെന്നും ബിജെപി എംപി മീനാക്ഷി ലേഖി ആഹ്വാനം ചെയ്തിരുന്നു.

ഉത്തരാഖണ്ഡിലെ ബിജെപി നേതാവ് ഹരാക് സിംഗ് റാവത്ത് ഉപവാസ ദിനത്തില്‍ കശുവണ്ടി കഴിച്ചതായി നേരത്തെ വെളിപ്പെടുത്തിയിരുന്നു.

മുൻപ് കോണ്‍ഗ്രസ് നേതൃത്വത്തെ ഒന്നടങ്കം നാണക്കേടിലാക്കികൊണ്ട് ഉപവാസത്തിന് തൊട്ടുമുന്‍പ് നേതാക്കള്‍ ഭക്ഷണം കഴിക്കുന്ന ചിത്രം സമൂഹ മാധ്യമങ്ങളില്‍ വൈറലായിരുന്നു അതിനു പിന്നാലെയാണ് ബിജെപി നേതാക്കൾ ഭക്ഷണം കഴിക്കുന്ന വീഡിയോ പുറത്ത് വന്നത്.