ജസ്റ്റിസ് ലോയയുടെ മരണത്തില്‍ സുപ്രീം കോടതി ജഡ്ജിയുടെ മേല്‍നോട്ടത്തില്‍ ഉന്നതതല സമിതി അന്വേഷിക്കണമെന്നാവശ്യപ്പെട്ട് സമര്‍പ്പിച്ച ഹർജിയിൽ സുപ്രീംകോടതി ഇന്ന് വിധി പറയും. രാവിലെ 10.30 ഓടെ ആയിരിക്കും വിധി പറയുക.

മാധ്യമ പ്രവര്‍ത്തകര്‍ ബി.എസ് ലോണ്‍, സാമൂഹ്യ പ്രവര്‍ത്തകന്‍ തെഹ്സീന്‍ പൂനവാല എന്നിവരാണ് സ്വതന്ത്ര അന്വേഷണം ആവശ്യപ്പെട്ട് സുപ്രീംകോടതിയെ സമീപിച്ചത്. ബിജെപി അധ്യക്ഷന്‍ അമിത് ഷാ പ്രതിയായ കൊലപാതക കേസ് പരിഗണനയില്‍ ഇരിക്കെ 2014 ഡിസംബറില്‍ നാഗ്പൂരില്‍ വെച്ചാണ് ജസ്റ്റിസ് ലോയ മരണപ്പെട്ടത്. ഹൃദയാഘാതത്തെ തുടര്‍ന്ന് മരണപ്പെട്ടുവെന്നായിരുന്നു കുടുംബാഗങ്ങള്‍ക്ക് ലഭിച്ച വിവരം.

സൊഹ്‌റാബുദ്ധീന്‍ വ്യാജ ഏറ്റുമുട്ടല്‍ കേസ് പരിഗണിച്ചിരുന്ന ജസ്റ്റിസ് ലോയയുടെ മരണം ദുരൂഹമാണെന്നും സുപ്രീംകോടതിയുടെ മേല്‍ നോട്ടത്തില്‍ അന്വേഷണം നടത്തണമെന്നും ആവശ്യപ്പെട്ടുള്ള ഹര്‍ജികളില്‍ കോടതി ഇന്ന് വിധി പറയും.

ലോയയുടെ മരണം ഹൃദയാഘാതം മൂലമല്ലെന്ന് എംയ്‌സിലെ ഫോറന്‍സിക് വിഭാഗം മേധാവിയായിരുന്ന ആര്‍ കെ ശര്‍മ സുപ്രീംകോടതിയെ അറിയിച്ചിട്ടുണ്ട്. ലോയ മരിച്ച സംഭവം ഗൗരവതരമാണെന്ന് നിരീക്ഷിച്ചിരുന്ന സുപ്രീംകോടതി മഹാരാഷ്ട്ര സര്‍ക്കാരിനോട് പോസ്റ്റ് മോര്‍ട്ടം റിപ്പോര്‍ട്ട് അടക്കമുള്ളവ നേരത്തെ ആവശ്യപ്പെട്ടിരുന്നു.ചീഫ് ജസ്റ്റിസ് ദീപക് മിശ്ര, എഎം ഖാന്‍വില്‍ക്കാര്‍, ഡിവൈ ചന്ദ്രചൂഡ് എന്നിവരടങ്ങിയ ബെഞ്ചാണ് കേസില്‍ വാദം കേട്ടിരുന്നത്.

എന്നാല്‍ പോസ്റ്റുമോര്‍ട്ടം റിപ്പോര്‍ട്ടിലെ അപാകതയും ആര്‍എസ്‌എസ് പ്രവര്‍ത്തകരുടെ സാന്നിധ്യവും ലോയയുടെ ബന്ധുകളില്‍ സംശയം ഉളവാക്കുകയായിരുന്നു. സൊഹ്‌റാബുദ്ധീന്‍ കേസില്‍ അമിത് ഷായ്ക്ക് അനുകൂലമായ വിധി നേടുന്നതിനായി 100 കോടി രൂപ ലോയയ്ക്ക് വാഗ്ദാനം ലഭിച്ചിരുന്നതായി ബന്ധുകള്‍ കാരവാന്‍ മാഗസിനോട് വെളിപ്പെടുത്തിയിരുന്നു. എന്നാല്‍ വാഗ്ദാനം നിരസിച്ച ലോയ ദിവസങ്ങള്‍ക്കുള്ളില്‍ ദുരൂഹസാഹചര്യത്തില്‍ മരണപ്പെട്ടു.

ഡിസംബർ ഒന്നിനാണ് നാഗ്പൂരിൽ വിവാഹ ചടങ്ങിൽ പങ്കെടുക്കാൻ പോകുന്നതിനിടെ ലോയ മരണപ്പെടുന്നത്. ഹൃദ്രോഗത്തെ തുടര്‍ന്നാണ് ലോയ മരിച്ചതെന്ന് ആര്‍എസ്എസ് പ്രവര്‍ത്തകനായ ഈശ്വര്‍ ബഹേതിയാണ് ലോയയുടെ പിതാവ് ഹര്‍കിഷനെ അറിയിച്ചത്. ബിജെപി അധ്യക്ഷൻ അമിത് ഷാ, രാജസ്ഥാൻ ആഭ്യന്തര മന്ത്രി ഗുലാബ്ചന്ദ് കടാരിയ എന്നിവർ പ്രതികളായ സൊഹ്റാബുദീൻ വ്യാജ ഏറ്റുമുട്ടൽ കേസിൽ വിചാരണ നടത്തുന്ന ജഡ്ജി മരിച്ചത് അന്വേഷിക്കണമെന്ന് ആവശ്യമുയർന്നിരുന്നു. അമിത് ഷാ ഒക്ടോബർ 31നു കോടതിയിൽ ഹാജരാകാത്തതിനെ ലോയ വിമർശിച്ചിരുന്നു