റോഹിംഗ്യകള്‍ തീവ്രവാദികളാണെന്ന വിവാദ പ്രസ്താവനയിൽ കുടുങ്ങി ബിജെപി യൂത്ത് വിംഗ് നേതാവ് മനീഷ് ചണ്ഡേല. രാജ്യത്തിന് ഭീഷണിയായ റോഹിംഗ്യകളുടെ ക്യാംപുകള്‍ കത്തിച്ചത് തങ്ങളാണെന്നും മനീഷ് ചണ്ഡേല. ഇക്കാര്യം വെളിപ്പെടുത്തി കൊണ്ട് ചണ്ഡേല ട്വീറ്റ് ചെയ്യുകയായിരുന്നു.

പ്രസ്താവന വിവാദമായതോടെ ദില്ലിയിലെ കലിന്ദ് കുഞ്ചില്‍ കഴിഞ്ഞ ദിവസം ഉണ്ടായ തീപ്പിടുത്തം ഇയാള്‍ ഉണ്ടാക്കിയതാണെന്നാണ് ഇപ്പോള്‍ ആരോപണം ഉയര്‍ന്നിരിക്കുന്നത്. തീപ്പിടുത്തത്തില്‍ ഇരുനൂറിലധികം റോഹിംഗ്യന്‍ അഭയാര്‍ത്ഥികള്‍ക്ക് വാസസ്ഥലം നഷ്ടപ്പെട്ടിരുന്നു.

അതേസമയം വിഷയം വന്‍ വിവാദമായതോടെ അദ്ദേഹം ട്വീറ്റ് പിന്‍വലിച്ചിട്ടുണ്ട്. മനീഷ് ചണ്ഡേലയ്‌ക്കെതിരെ ഓള്‍ ഇന്ത്യന്‍ മുസ്ലീം മജ്‌ലിസ് ഇ മുഷാവറത്ത് ദില്ലി പോലീസിന് പരാതി നല്‍കിയിട്ടുണ്ട്. ഇവരുടെ പരാതിയില്‍ മനീഷിന്റെ ട്വീറ്റിന്റെ സ്‌ക്രീന്‍ഷോട്ടുമുണ്ട്. ദില്ലിയിലെ അഭാര്‍ത്ഥി ക്യാംപുകള്‍ ഇയാള്‍ തന്നെയാണ് കത്തിച്ചതെന്ന് പോലീസ് പറയുന്നു. മനീഷിന്റെ ട്വീറ്റുകളില്‍ നിന്നും അതാണ് മനസിലാവുന്നത്. ഞങ്ങള്‍ തന്നെയാണ് ക്യാംപുകള്‍ കത്തിച്ചത്. ഇനിയും കത്തിക്കും. കാരണം അവര്‍ തീവ്രവാദികളാണെന്ന് മനീഷ് ആവര്‍ത്തിച്ചിട്ടുണ്ട്. പരസ്യ പ്രസ്താവനയില്‍ ബിജെപി നേതൃത്വവും പ്രതിരോധത്തിലാണ്. റോഹിംഗ്യകളെ സംരക്ഷിക്കുമെന്നാണ് ഇന്ത്യയുടെ നിലപാട്.

അതേസമയം വിഷയത്തില്‍ യുഎന്‍ ഇടപെട്ടാല്‍ ഇന്ത്യക്ക് തിരിച്ചടിയാവും. നേതാവിനെതിരെ എത്രയും പെട്ടെന്ന് നടപടിയെടുക്കാന്‍ നിര്‍ദേശം ലഭിച്ചിട്ടുണ്ട്. എന്നാല്‍ ഇയാള്‍ സോഷ്യല്‍ മീഡിയ വഴി റോഹിംഗ്യന്‍ ക്യാംപുകള്‍ കത്തിച്ചു എന്ന് അവകശാപ്പെട്ടത് കൂടുതല്‍ പേര്‍ ഏറ്റെടുത്തിട്ടുണ്ട്. റോഹിൻഗ്യകളുടെ അഭയാർഥി പ്രശ്നത്തിൽ ആർ എസ്‌എസ് എതിരെയാണ്. രോഹിൻഗ്യകൾ തീവ്രവാദികളാണെന്നാണ് ഇവരുടെ വാദം. സംഭവം ബിജെപി നേതൃത്വത്തെ പ്രതിസന്ധിയിലാക്കിയിരിക്കുകയാണ്.