കാമുകിയുടെ കല്യാണം മുടക്കാൻ കാമുകന്റെ സിനിമാ സ്റ്റൈൽ എൻട്രി. വിവാഹ മുഹൂര്‍ത്തത്തിന് നിമിഷങ്ങൾ മാത്രം ബാക്കിനിൽക്കെ ബൈക്കിലെത്തിയ കാമുകന്‍ വധുവിന് നേരെ വരണമാല്യമെറിഞ്ഞു . ഉത്തര്‍പ്രദേശിലെ ബിജ്‌നോറിലാണ് സിനിമാക്കഥകളെ വെല്ലുന്ന നാടകീയ സംഭവംഅരങ്ങേറിയത്.

കല്യാണത്തില്‍ പങ്കെടുക്കാനെത്തിയ നിറഞ്ഞ സദസിനെ സാക്ഷി നിറുത്തിയായിരുന്നു യുവാവിന്റെ രംഗപ്രവേശം. ബൈക്കിലെത്തിയ ഇയാള്‍ കൈയില്‍ കരുതുയിരുന്ന ഹാരം കൃത്യമായി കതിര്‍മണ്ഡപത്തിലിരുന്ന കാമുകിയുടെ കഴുത്തിലേക്കെറിഞ്ഞു. ആദ്യം എന്താണ് സംഭവിക്കുന്നതെന്ന് സദസിനു മനസിലായില്ല. എന്നാൽ കൈയിൽ കരുതിയ ഹാരവുമായി വധുവും കാമുകന്റെ അടുത്തെത്തി അണിയിച്ചപ്പോൾ എല്ലാവര്ക്കും കാര്യം പിടികിട്ടി. അപ്പോളും കാര്യങ്ങളൊന്നും പിടികിട്ടാതെ മണ്ഡപത്തില്‍ സ്‌തബ്‌ധനാക്കി ഇരിക്കുകയായിരുന്നു വരന്‍.

കാര്യം പിടികിട്ടിയതിനു ശേഷം വരന്റെ ബന്ധുക്കളുടെ അടിയുടെ പൊടി പൂരമായിരുന്നു പിന്നീട് സംഭവിച്ചത്. ഒടുവില്‍ പൊലീസെത്തി കാമുകനെ രക്ഷിച്ചു. ഒരുമിച്ച് പഠിച്ച തങ്ങളുടെ വിവാഹത്തിന് ബന്ധുക്കള്‍ സമ്മതിക്കാതിരിന്നതിനെ തുടര്‍ന്നായിരുന്നു കമിതാക്കളുടെ ഇത്തരം സാഹസം.