നടിയും കോണ്‍ഗ്രസ് നേതാവുമായ ഖുശ്ബു താന്‍ മുസ്്‌ലിം സമുദായത്തിലാണ് ജനിച്ചതെന്നും മരിക്കുന്നതും മുസ്്‌ലിമായിട്ടായിരിക്കുമെന്നും ട്വീറ്റ് ചെയ്തതോടെ സംഘികളുടെ സൈബര്‍ ആക്രമണം. നഖത് ഖാന്‍ എന്നാണ് ഖുശ്ബുവിന്റെ സര്‍ട്ടിഫിക്കറ്റ് ബുക്കിലെ പേര്. സിനിമയിലെത്തിയതോടെയാണ് താരം ഖുശ്ബു എന്ന് പേര് മാറ്റിയത്. സംവിധായകന്‍ സുന്ദര്‍ സിയെ വിവാഹം കഴിച്ചതോടെ ഖുശ്ബു സുന്ദറായി. മരിക്കുന്നത് വരെ മതം മാറേണ്ട കാര്യമില്ലെന്നാണ് താരം ട്വീറ്റില്‍ വ്യക്തമാക്കുന്നത്. മതനിയമം അനുസരിച്ചല്ല ജീവിക്കുന്നത്. അനുകമ്പ, മാനവീകത, സ്ത്രീ ശാക്തീകരണം, തുല്യത, ഐക്യം, വൈവിധ്യം, സന്തോഷം, ആനന്ദം, മതേതരത്വം എന്നിവ അനുസരിച്ചാണ് ജീവിക്കുന്നത്. എന്നാല്‍ ബി.ജെ.പിക്ക് ഇതില്‍ നിന്ന് വ്യത്യസ്തമായ നിയമങ്ങളായിരിക്കുമെന്നാണ് താരം ട്വിറ്ററില്‍ കുറിച്ചത്.

ഇതോടെയാണ് താരത്തിനെതിരെ സംഘപരിവാര്‍ പ്രവര്‍ത്തകരുടെ അധിഷേപവും വിമര്‍ശനങ്ങളും ആക്ഷേപങ്ങളും തുടങ്ങിയത്. നിരീശ്വരവാദിയാണെന്ന് ആവര്‍ത്തിച്ച് പറഞ്ഞിരുന്ന ഖുശ്ബു ഇപ്പോഴെങ്ങനെ മുസ്്‌ലിംമായി തുടങ്ങിയ ആക്രോശങ്ങളും ചിലര്‍ നടത്തി. ഇതോടെ താരം മറുപടിയുമായി രംഗത്തെത്തി. ഖുശ്ബു സുന്ദര്‍ ബി.ജെ.പിക്ക് പക്ഷെ, ഇത് നഖത് ഖാന്‍ എന്ന് താരം ട്വീറ്റ് ചെയ്തു. . മുസ്ലിം ആണെന്ന് പറയുന്നുണ്ടെങ്കില്‍ എന്തിന് ഹിന്ദു പേര്‍ ഉപയോഗിക്കുന്നുവെന്നായിരുന്നു മറ്റു ചിലരുടെ ചോദ്യം. ഇതോടെയാണ് ബി.ജെ.പി.യുടെ കടുത്ത വിമര്‍ശക കൂടിയായ താരം വേറിട്ട മറുപടിയുമായി രംഗത്തെത്തിയത്. തമിഴ്‌നാട്ടില്‍ കോണ്‍ഗ്രസിന്റെ അനിഷേധ്യ നേതാവായ ഖുശ്ബുവിന് ധാരാളം ആരാധകരുണ്ട്. അതിനാല്‍ താരത്തിന്റെ ട്വീറ്റ് സംഘികളെ ചൊടിപ്പിച്ചു.