യുപി, ചത്തിസ്ഗഢ്, മധ്യപ്രദേശ്, രാജസ്ഥാന്‍, ബിഹാര്‍ തുടങ്ങിയ സംസ്ഥാനങ്ങളാണ് രാജ്യത്തിന്റെ പിന്നോക്കാവസ്ഥയ്ക്ക് കാരണമെന്ന് നീതി ആയോഗ് സിഇഒ. ജാമിയ മിലിയ ഇസ്ലാമിയ സര്‍വകലാശാലയുടെ പ്രഥമ അബ്ദുള്‍ ഗാഫര്‍ ഖാന്‍ സ്മാരക പ്രഭാഷണം നടത്തുമ്പോഴായിരുന്നു അമിതാഭിന്റെ പരാമര്‍ശം.

ഉത്തര്‍പ്രദേശ്, ചത്തിസ്ഗഢ്, മധ്യപ്രദേശ്, രാജസ്ഥാന്‍, ബിഹാര്‍ പോലുള്ള സംസ്ഥാനങ്ങളാണ് സാമൂഹിക സൂചകങ്ങളില്‍ ഇന്ത്യ പിന്നാക്കമാകാന്‍ കാരണമെന്ന് അദ്ദേഹം വ്യക്തമാക്കി. രാജ്യത്തെ വ്യാപാര സൗഹൃദ അന്തരീക്ഷം മെച്ചപ്പെടുത്താനായെങ്കിലും മാനവ വികസന സൂചികയില്‍ ഇന്ത്യ പിന്നിലാണ്.

‘ഇന്ത്യയുടെ കിഴക്കന്‍ സംസ്ഥാനങ്ങള്‍, പ്രത്യേകിച്ച് ബിഹാര്‍, യു.പി, ചത്തിസ്ഗഢ്, മധ്യപ്രദേശ്, രാജസ്ഥാന്‍ എന്നിവയാണ് സാമൂഹ്യ സൂചനകങ്ങളില്‍ ഇന്ത്യയെ പിന്നോട്ട് നയിക്കുന്നത്. ബിസിനസ് ചെയ്യാനുളള ബുദ്ധിമുട്ട് നമ്മള്‍ കുറച്ചിട്ടുണ്ടെങ്കിലും ഹ്യൂമണ്‍ ഡെവലപ്പ്മെന്റ് ഇന്റക്സിന്റെ കാര്യത്തില്‍ നമ്മള്‍ പിന്നില്‍ തന്നെയാണ്.’ അദ്ദേഹം പറയുന്നു.

അതെ സമയം ദക്ഷിണേന്ത്യയും പടിഞ്ഞാറന്‍ ഇന്ത്യയും മികച്ച പ്രകടനമാണ് കാഴ്ച്ച വയ്ക്കുന്നത്. രാജ്യത്തിന്റെ ഈ ഭാഗങ്ങൾ ത്വരിത വളര്‍ച്ച നേടുന്നുണ്ടെന്നും അദ്ദേഹം കൂട്ടിച്ചേര്‍ത്തു.