വിദേശ ഏജന്‍സികളെ വാടകയ്ക്കെടുത്ത് കള്ളം പ്രചരിപ്പിക്കുകയും ജാതിയുടെ പേരില്‍ സമൂഹത്തെ വിഭജിക്കുകയും ചെയ്യുന്ന കോണ്‍ഗ്രസിന്റെ സംസ്‌കാരം അവസാനിപ്പിക്കാതെ രാഷ്ട്രീയ വിശുദ്ധി വരില്ലന്നു പ്രധാനമന്ത്രി നരേന്ദ്ര മോദി. കര്‍ണാടക തിരഞ്ഞെടുപ്പുമായി ബന്ധപ്പെട്ട് സ്ഥാനാര്‍ത്ഥികളുമായും നേതാക്കളുമായും 'നരേന്ദ്ര മോദി ആപ്പി'ലൂടെ സംവദിക്കുമ്പോഴാണ് അദ്ദേഹം ഇക്കാര്യം വ്യക്തമാക്കിയത്.

കോണ്‍ഗ്രസിന്റെ നുണപ്രചാരണം പരാജയപ്പെടുത്താന്‍ ജനങ്ങളെ നേരിട്ട് ബന്ധപ്പെടണമെന്നും മോദി പറഞ്ഞു.

കഴിഞ്ഞ കുറച്ച്‌ തിരഞ്ഞെടുപ്പുകള്‍ പരിശോധിച്ചാല്‍ മതത്തിന്റെ പേരില്‍ കോൺഗ്രസ്സ് സമൂഹത്തെ വിഭജിക്കുന്നത് എങ്ങനെയെന്ന് തിരിച്ചറിയാനാകും. തിരഞ്ഞുടുപ്പിന് മുമ്പ് ഒരു സമുദായത്തിന് ലോലിപോപ്പ് നല്‍കും, തിരഞ്ഞെടുപ്പ് കഴിഞ്ഞാല്‍ അത് മറക്കും. ചില സമുദായങ്ങളുടെ വികാരം തിരഞ്ഞെടുപ്പുകള്‍ക്ക് മുമ്പായി ചൂഷണം ചെയ്യുക എന്നത് കോണ്‍ഗ്രസിന്റെ രീതിയാണ്.

പ്രവര്‍ത്തനങ്ങള്‍ക്ക് ഒരു പ്രധാന്യവും അവര്‍ നല്‍കില്ല. സമൂഹത്തെ വിഭജിക്കുന്നതില്‍ രസിച്ച്‌ കൊണ്ടിരിക്കുകയാണ് അവര്‍. കോണ്‍ഗ്രസ് സംസ്‌കാരം മുഖ്യധാരയില്‍ നിന്ന് ഇല്ലാതാക്കുന്നത് വരെ രാജ്യത്ത് രാഷ്ട്രീയ ശുദ്ധീകരണം സാധ്യമല്ലെന്നും മോദി പറഞ്ഞു.

കോണ്‍ഗ്രസിന്റെ കപട പ്രചാരണങ്ങളില്‍ പാര്‍ട്ടി പ്രവര്‍ത്തകര്‍ വീഴരുത്. നേരത്തെ അവര്‍ ഉയര്‍ത്തുന്ന വിഷയങ്ങളില്‍ അഞ്ച് മുതല്‍ പത്ത് വരെ കള്ളങ്ങളാണ് പ്രചരിപ്പിച്ചിരുന്നതെങ്കിൽ ഇപ്പോളത് അമ്പത് വരെയായിട്ടുണ്ട്. വികസനത്തെ കുറിച്ച്‌ സംസാരിക്കാന്‍ മറ്റു രാഷ്ട്രീയ പാര്‍ട്ടികള്‍ മടിക്കുകയാണ്. അതേസമയം ബിജെപി തിരഞ്ഞെടുപ്പുകളെ സമീപിക്കുന്നത് വികസന മോഡലുകള്‍ ചൂണ്ടിക്കാട്ടി മാത്രമാണെന്നും മോദി പറഞ്ഞു.