13 കുരുന്നുകളുടെ ജീവനെടുത്ത അപകടത്തിന് കാരണം ഡ്രൈവറുടെ ഫേണ് വിളി
യു.പിയിലെ കുശിനഗറില് 13 കുട്ടികളുടെ ജീവനെടുത്ത അപകടത്തിന് കാരണം ഡ്രൈവറുടെ ഫോണ് വിളിയെന്ന് രക്ഷപ്പെട്ട കുട്ടിയുടെ വെളിപ്പെടുത്തല്. സ്കൂള് കുട്ടികളുമായി പോകുകയായിരുന്ന വാന് ആളില്ലാ ലെവല് ക്രോസില് വച്ച് ട്രെയിന് ഇടിച്ചാണ് 13 കുട്ടികളുടെ ജീവന് പൊലിഞ്ഞത്. ഡ്രൈവര് മൊബൈല് ഫോണില് സംസാരിച്ചു കൊണ്ടിരുന്നതാണ് അപകടകാരണമെന്ന് പരുക്കുകളോടെ രക്ഷപെട്ട ഒന്പത് വയസുകാരന് പറഞ്ഞു.
ട്രെയിന് വരുന്നത് കണ്ട് താനടക്കമുള്ള കുട്ടികള് ബഹളം വച്ചിരുന്നു. എന്നാല് മൊബൈല് ഫോണില് സംസാരിച്ചു കൊണ്ടിരുന്ന ഡ്രൈവര് അത് ശ്രദ്ധിച്ചില്ലെന്ന് ഗൊരഖ്പൂരിലെ ബി.ആര്.ഡി മെഡിക്കല് കോളജില് ചികിത്സയില് കഴിയുന്ന കൃഷ്ണ വര്മ്മ എന്ന വിദ്യാര്ത്ഥി പറഞ്ഞു.
കൃഷ്ണ വര്മ്മയുടെ സഹോദരി റോഷ്നിയും ഇതേ ആശുപത്രിയില് ചികിത്സയിലാണ്. കുശിനഗറിലെ ഡിവൈന് മിഷന് സ്കൂളിലെ കുട്ടികള് സഞ്ചരിച്ച വാന് ഇന്ന് രാവിലെയാണ് അപകടത്തില്പ്പെട്ടത്. വാന് ഓടിച്ചിരുന്ന ഡ്രൈവര് നിയാസ് അഹമ്മദ് (22) ബി.ആര്.ഡി മെഡിക്കല് കോളജില് വെന്റിലേറ്ററില് ചികിത്സയിലാണ്.
https://www.facebook.com/Malayalivartha
