അമ്മയുടെ കൈകളില് നിന്ന് താഴേക്കു വീണ കുഞ്ഞിന് രക്ഷകയായത് എയര്ഹോസ്റ്റസ്
വിമാന യാത്രക്കിടെ അടിയന്തിരാവസ്ഥ നേരിട്ടാല് ക്രൂ മെമ്പര്മാര് സഹായത്തിനെത്താറാണ് പതിവ്. യാത്ര ചെയ്യാത്ത സമയങ്ങളില് അങ്ങനെയുണ്ടാകണമെന്നില്ല. എന്നാല് അതിന് വിപരീതമായി ജെറ്റ് എയര്വേസില് എയര്ഹോസ്റ്റസായി ജോലി ചെയ്യുന്ന മിതാന്ഷി വൈദ്യ മാലാഖയായി മാറിയത് 10 മാസം പ്രായമുള്ള കുഞ്ഞിനെ രക്ഷിച്ചതിലൂടെയാണ്.
മുംബൈ എയര്പോര്ട്ടില് വെച്ച് കഴിഞ്ഞ മാസമായിരുന്നു സംഭവം നടന്നത്. അഹമ്മദാബാദിലേക്ക് അമ്മ ഗുലാഫ ഷെയ്ഖിനൊപ്പം പോകുകയായിരുന്ന 10 മാസം പ്രായമുള്ള ആണ്കുട്ടി അമ്മയുടെ കൈകളില് നിന്ന് താഴേക്ക് പതിച്ചെങ്കിലും മിതാന്ഷിയുടെ സമയോചിതമായ ഇടപെടല് മൂലം യാതൊരു പരിക്കും കൂടാതെ രക്ഷപ്പെടുകയായിരുന്നു.
ചെക്ക് ഇന് കഴിഞ്ഞ് സെക്യൂരിറ്റി ചെക്ക് കൗണ്ടറിലേക്ക് പോകുന്ന സമയം കുട്ടി താഴേക്ക് വീഴുന്നത് കണ്ട മിതാന്ഷി സ്വന്തം രക്ഷ നോക്കാതെ താഴേക്ക് വീണ് കുട്ടിയെ പരിക്ക് കൂടാതെ കൈകളില് കോരിയെടുക്കുകയായിരുന്നു. വീഴ്ചയില് മിതാന്ഷിക്ക് മുഖത്ത് പരിക്കേറ്റെങ്കിലും അത് വക വെയ്ക്കാതെ വീണ്ടും ജോലി തുടര്ന്ന അവരെ മാലാഖയെന്നാണ് കുഞ്ഞിന്റെ അമ്മ ഗുലാഫ വിശേഷിപ്പിച്ചത്.
14 വര്ഷം കുഞ്ഞുങ്ങളില്ലാത്ത തങ്ങള്ക്ക് ലഭിച്ച കുട്ടിയെ രക്ഷിച്ച മാലാഖയാണ് മിതാന്ഷിയെന്ന് ജെറ്റ് എയര്വേസിന് പിന്നീട് അയച്ച കത്തില് സ്വകാര്യ കമ്പനി എംഡി കൂടിയായ ഗുലാഫ ഷെയ്ഖ് പറഞ്ഞു. മൊബൈല് നമ്പര് ചോദിച്ചെങ്കിലും അത് നല്കുന്നത് കമ്പനി പോളിസികള്ക്ക് എതിരാണെന്നായിരുന്നു മറുപടിയും ഒന്നും വാങ്ങാന് കൂട്ടാക്കാതിരുന്ന മിതാന്ഷി നിങ്ങളുടെ പ്രാര്ത്ഥനകളില് ഞാനുണ്ടായാല് മതിയെന്ന് മാത്രമാണ് പറഞ്ഞതെന്നും ഗുലാഫ കത്തില് പറയുന്നു.
https://www.facebook.com/Malayalivartha
