കർണ്ണാടക തെരഞ്ഞെടുപ്പിൽ കോൺഗ്രസ്സിനൊപ്പം നിൽക്കുമെന്ന് സി.പി.എം പോളിറ്റ് ബ്യൂറോ അംഗം പ്രകാശ് കാരാട്ട്. കർണ്ണാടകയിൽ ബിജെപി വിരുദ്ധ വോട്ട് ഒന്നിക്കണമെന്നും കേന്ദ്ര സർക്കാറിന്റെ തെറ്റായ നയത്തിനെതിരായ സമരത്തിൽ പാർട്ടികൾ ഒന്നിക്കണമെന്നും പ്രകാശ് കാരാട്ട് പറഞ്ഞു. ഒഞ്ചിയം രക്തസാക്ഷി ദിനാചരണത്തിന്റെ 70ാം വാർഷികാഘോഷം ഉദ്ഘാടനം ചെയ്യുകയായിരുന്നു അദ്ദേഹം.

രാജ്യത്ത് ബി ജെ പി ക്കെതിരായ വികാരം ഉയർന്നു വരികയാണ് അത് സി.പി.എം ന് അനുകൂലമാണെന്ന് പ്രകാശ് കാരാട്ട് പറഞ്ഞു. തെരഞ്ഞെടുപ്പുകളിലെല്ലാം ബി ജെ പി തുടർച്ചയായി പരാജയപ്പെടുന്നു ഇത് കർണ്ണാടകയിലും അവർത്തിക്കും. കോൺഗ്രസ്സുമായി രാഷ്ട്രീയ സഖ്യമുണ്ടാവില്ലെന്ന് അവർത്തിച്ച കാരാട്ട്  ബി ജെ പി വിരുദ്ധ വോട്ടുകൾ കർണ്ണാടകയിൽ ഒന്നിക്കണമെന്ന് ആവശ്യപ്പെട്ടു.

കേന്ദ്രസർക്കാറിന്റെ ജനവിരുദ്ധ നയങ്ങൾക്കെതിരെ 'സമരം സംഘടിപ്പിച്ച് കോൺഗ്രസ്സ് അനുകൂലികളെയും cpm നൊപ്പം നിർത്താൻ ശ്രമിക്കണമെന്നും കാരാട്ട് അഭിപ്രായപ്പെട്ടു. കെ.ഗംഗാധര കുറുപ്പ് അദ്ധ്യക്ഷനായി. മന്ത്രി ടി.പി.രാമകൃഷ്ണൻ, പി.സതീദേവി, സത്യൻ മൊകേരി, പി. മോഹനൻ , മുഹമ്മദ് റിയാസ് തുടങ്ങിയവർ സംസാരിച്ചു. പൊതുസമ്മേളനത്തിന് മുന്നോടിയായി നടന്ന പ്രകടനത്തിൽ ആയിരങ്ങൾ അണിനിരന്നു.