നികുതി വെട്ടിച്ച് കടത്താന്‍ ശ്രമിച്ച നൂറോളം ആപ്പിള്‍ ഐഫോണുകള്‍ കസ്റ്റംസ് അധികൃതര്‍ പിടിച്ചെടുത്തു. ഡല്‍ഹി ഇന്ദിരാഗാന്ധി അന്താരാഷ്ട്ര വിമാനത്താവളത്തില്‍ കസ്റ്റംസ് അധികൃതരാണ് കള്ളക്കടത്ത് പിടികൂടിയത്. പിടിച്ചെടുത്ത ആപ്പിള്‍ ഐഫോണ്‍ എക്‌സ് ഫോണുകള്‍ക്ക് വിപണിയില്‍ 85 ലക്ഷം രൂപ വിലമതിക്കും. ദുബായിയില്‍ നിന്നെത്തിയ ആളില്‍നിന്നാണ് ഫോണുകള്‍ കണ്ടെടുത്തത്. രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന. 

ദുബായിയില്‍ ഐഫോണ്‍ എക്‌സിന് ഇന്ത്യയിലേക്കാള്‍ വിലക്കുറവില്‍ ലഭിക്കും. 95,390 രൂപയാണ് 64 ജിബി ഐഫോണ്‍ എക്‌സിന് ഇന്ത്യയിലെ വില. ഈ ഫോണ്‍ വാങ്ങാന്‍ ദുബായിയില്‍ 78,294 രൂപ നല്‍കിയാല്‍ മതി. 256 ജിബി മെമ്മറിയുള്ള ഐഫോണിന് 1.08 ലക്ഷം രൂപ ഇന്ത്യയില്‍ വില മതിക്കും. ഈ ഫോണിന് 90,318 ഇന്ത്യന്‍ രൂപയാണ് ദുബായിയില്‍ ചെലവു വരിക.