കര്‍ണാടകയില്‍ നരേന്ദ്രമോഡിയോ അമിത്ഷായോ വിഷയമല്ലെന്നും തെരഞ്ഞെടുപ്പിലെ യഥാര്‍ത്ഥ എതിരാളി യദ്യൂരപ്പയാണെന്നും മുഖ്യമന്ത്രി സിദ്ധരാമയ്യ. ശനിയാഴ്ച നടക്കാനിരിക്കുന്ന തെരഞ്ഞെടുപ്പിന്റെ ഭാഗമായി സംസ്ഥാനത്തെ നാലാം ഘട്ട പ്രചരണത്തിനായി സംസ്ഥാനത്ത് കറങ്ങുന്നതിനിടയിലാണ് മോഡിയേയും അമിത്ഷായേയും പരിഹസിച്ച് സിദ്ധരാമയ്യ രംഗത്ത് വന്നിരിക്കുന്നത്.

സംസ്ഥാനത്ത് മോഡിയ്‌ക്കോ അമിത്ഷായ്‌ക്കോ കാര്യമായ സ്വാധീനമില്ല. മോഡി പോലും വിഷയമല്ലാത്ത കര്‍ണാടകയില്‍ അമിത്ഷാ എന്തു ചെയ്യാനാണെന്ന് സിദ്ധരാമയ്യ ചോദിച്ചു. മോഡിയുടെ ജനപ്രാതിയതയൊക്കെ വന്‍ തോതില്‍ ഇടിവ് സംഭവിച്ചു കൊണ്ടിരിക്കുകയാണ്. അപ്പോള്‍ അമിത്ഷായ്ക്ക് എന്തു ജനപ്രിയത കൈവരിക്കാനാകുമെന്നാണ് കരുതേണ്ടെന്ന് സിദ്ധരാമയ്യ ചോദിക്കുന്നു.

ബിജെപി അദ്ധ്യക്ഷന് കര്‍ണാടക വോട്ടര്‍മാരില്‍ യാതൊരു സ്വാധീനവും ചെലുത്താന്‍ കഴിയില്ല. അമിത്ഷായുടെ പ്രചാരണം തന്നെ ഒരു കോമഡിഷോ ആണെന്നും പറഞ്ഞു. തെരഞ്ഞെടുപ്പ് പ്രചരണത്തിന്റെ അവസാന ഘട്ടത്തില്‍ ഇരുപതോളം ഭീമന്‍ റാലികളിലാണ് മോഡി പങ്കെടുക്കുന്നത്. സംസ്ഥാനത്ത് ബിജെപിയുടെ പിന്തുണ സുനാമി പോലെയാണെന്നാണ് മോഡി പറയുന്നത്. അമിത്ഷായും വന്‍ പ്രചരണ പരിപാടികളിലാണ് പങ്കെടുക്കുന്നത്.