ഭക്തി മൂത്ത് മദ്ധ്യവയസ്ക സ്വന്തം നാവ് മുറിച്ചെടുത്ത് ക്ഷേത്രത്തിന് സമര്‍പ്പിച്ചു. മദ്ധ്യപ്രദേശിലെ തര്‍സാമ ജില്ലയിലാണ് ഇത്തരത്തിലൊരു സംഭവം അരങ്ങേറിയത്. ദുർഗ്ഗാദേവിയുടെ കടും ഭക്തയായ ഗുഡ്ഢി തോമര്‍ (45) എന്ന സ്ത്രീയാണ് ബുധനാഴ്ച ഭക്തി മൂത്ത് നാവ് മുറിച്ചെടുത്തത്.

ക്ഷേത്രത്തിലെത്തിയ ഇവര്‍ പ്രാര്‍ത്ഥനയ്ക്ക് ശേഷം കത്തിയെടുത്ത് നാവ് മുറിക്കുകയായിരുന്നെന്ന് ദൃക്സാക്ഷികള്‍ പറഞ്ഞു. ചോരയില്‍ കുളിച്ച്‌ ബോധം കെട്ട ഇവരെ മറ്റ് വിശ്വാസികള്‍ ചേര്‍ന്ന് ആശുപത്രിയില്‍ എത്തിക്കുകയായിരുന്നു. മുറിച്ചെടുത്ത നാവ് ഇവര്‍ ബിജാസെന്‍ മാതാ എന്ന ക്ഷേത്രത്തിലാണ് സമർപ്പിച്ചത്.

അതേസമയം മുറിച്ചെടുത്ത ഇവരുടെ നാവ് തുന്നിച്ചേര്‍ക്കാന്‍ കഴിഞ്ഞോ എന്ന് വ്യക്തമല്ല. എന്നാൽ, നാവ് മുറിച്ചത് മാറ്റാരുടേയും പ്രേരണ കൊണ്ടല്ലെന്ന് പൊലീസ് അറിയിച്ചു.

ഗുഡ്ഢി തോമര്‍ വലിയൊരു ദുര്‍ഗ ഭക്തയാണെന്നും വിവാഹം നടന്ന അന്ന് മുതല്‍ രാവിലേയും വൈകീട്ടും ദുര്‍ഗാ ക്ഷേത്രം സന്ദര്‍ശിക്കാറുണ്ടെന്നും ഭര്‍ത്താവ് രവി തോമര്‍ പറഞ്ഞു. ക്ഷേത്രത്തില്‍ ദര്‍ശനത്തിനാണെന്നും പറഞ്ഞാണ് ബുധനാഴ്ച വീട്ടില്‍ നിന്നും പോയത്. നാവ് മുറിച്ച്‌ ക്ഷേത്രത്തിന് സമര്‍പ്പിക്കുമെന്ന് ഒരിക്കലും കരുതിയില്ലെന്നും അദ്ദേഹം കൂട്ടിച്ചേര്‍ത്തു. മൂന്ന് ആണ്‍മക്കളാണ് ഇവര്‍ക്കുള്ളത്.