കര്‍ണ്ണാടകയില്‍ സത്യപ്രതിജ്ഞാ തീയതി പ്രഖ്യാപിച്ച് യെദ്യൂരപ്പ.മേയ് 17 ന് തന്റെ നേതൃത്വത്തിലുള്ള മന്ത്രിസഭ സത്യപ്രതിജ്ഞ ചെയ്ത് അധികാരമേല്‍ക്കുമെന്നാണ് ബിജെപിയുടെ മുഖ്യമന്ത്രി സ്ഥാനാര്‍ത്ഥിയായ യെദ്യൂരപ്പയുടെ പ്രഖ്യാപനം. 140 മുതല്‍ 150 വരെ സീറ്റുകള്‍ നേടിയാകും ബിജെപി അധികാരത്തിലെത്തുകയെന്നും യെദ്യൂരപ്പ അവകാശപെട്ടു. നിയമസഭാ തെരഞ്ഞെടുപ്പില്‍ വോട്ട് രേഖപെടുത്തിയ ശേഷമാണ് യെദ്യൂരപ്പ ബിജെപി അധികാരത്തിലെത്തുമെന്ന് ആത്മവിശ്വാസം പ്രകടിപ്പിച്ചത്.

15 ാം തീയതി തെരഞ്ഞെടുപ്പ് ഫലം വരുന്നതിന് പിന്നാലെ താന്‍ ഡെല്‍ഹിക്ക് പോവുകയും പ്രധാനമന്ത്രിമാരെയും മറ്റ് മന്ത്രിമാരെയും സത്യപ്രതിജ്ഞാ ചടങ്ങിലേക്ക് ക്ഷണിക്കുമെന്നും അദ്ദേഹം അറിയിച്ചു. ശക്തമായ ഭരണ വിരുദ്ധ വികാരം കര്‍ണാടകയിലില്ലെന്ന് തെരഞ്ഞെടുപ്പ് സര്‍വ്വെകളെല്ലാം വ്യക്തമാക്കുമ്പോഴും ബിജെപി തികഞ്ഞ ആത്മ വിശ്വാസത്തിലാണ്. പ്രധാനമന്ത്രി നരേന്ദ്രമോദിയുടെ നേതൃത്വത്തില്‍ വന്‍ തെരഞ്ഞെടുപ്പ് റാലികള്‍ സംഘടിപ്പിച്ച ബിജെപി തെരഞ്ഞെടുപ്പ് സര്‍വ്വെകളെല്ലാം അവഗണിച്ച് പ്രചരണ രംഗത്ത് ശക്തമായ മുന്നേറ്റമാണ് നടത്തിയത്.

2008 ല്‍ മുഖ്യമന്ത്രിയായ യെദ്യൂരപ്പ അഴിമതിക്കേസില്‍ പെട്ട് 2011 ല്‍ മന്ത്രിസ്ഥാനം രാജിവെയ്ക്കുകയായിരുന്നു.അഴിമതികേസില്‍ ജയിലില്‍ കിടന്ന യെദ്യൂരപ്പ തെരഞ്ഞെടുപ്പില്‍ വിജയം നേടി വന്‍ തിരിച്ച് വരവാണ് ലക്ഷ്യമിടുന്നത്. അഴിമതിക്കെതിരെ കടുത്ത നിലപാട് സ്വീകരിക്കുന്ന ബിജെപി പാര്‍ട്ടിയില്‍ കര്‍ണ്ണാടകയില്‍ യെദ്യൂരപ്പയ്ക്ക് പകരം മറ്റൊരു നേതാവില്ലാത്തതിനാല്‍ അദ്ദേഹത്തെ തന്നെ മുഖ്യമന്ത്രി സ്ഥാനാര്‍ത്ഥിയാക്കുകയായിരുന്നു.