ജമ്മു-കാശ്മീര്‍ അന്താരാഷ്ട്ര അതിര്‍ത്തിയിലെ സാംബയിലുണ്ടായ വെടിവെപ്പില്‍ അതിര്‍ത്തി സുരക്ഷാ സേന ഉദ്യോഗസ്ഥന്‍ കൊല്ലപ്പെട്ടു. ഇന്ന് പുലര്‍ച്ചെയാണ് വെടിവെപ്പുണ്ടായത്. വെടിയേറ്റയുടന്‍ ജവാന് വൈദ്യസഹായം നല്‍കിയെങ്കിലും മരണം സംഭവിക്കുകയായിരുന്നു.

മാങ്കുചക്ക് പോസ്റ്റിലാണ് വെടിവെപ്പ് നടന്നത്. അതിര്‍ത്തിക്കടുത്ത് സംശയാസ്പദമായ നീക്കം കണ്ട ഉദ്യോഗസ്ഥര്‍ വെടിവെപ്പ് നടത്തുകയായിരുന്നു. ഉടന്‍ തിരിച്ചടി ഉണ്ടാവുകയും ഉദ്യോഗസ്ഥന് വെടിയേല്‍ക്കുകയും ചെയ്തു. വെടിവെപ്പ് അവസാനിച്ചെങ്കിലും സേന പ്രദേശത്ത് തിരച്ചില്‍ തുടരുകയാണ്.