കര്‍ണാടക തിരഞ്ഞെടുപ്പില്‍ കോണ്‍ഗ്രസിനേറ്റ തിരിച്ചടിയില്‍ രാഷ്ട്രീയ ലോകം തിരയുന്നത് രാഹുല്‍ ഗാന്ധിയെ. 122 സീറ്റുകളുണ്ടായിരുന്ന കര്‍ണാടകയില്‍ 77 സീറ്റുകളിലേക്കാണ് കോണ്‍ഗ്രസ് താണത്. ഇതിന് മറുപടി പറയേണ്ടത് പ്രചരണത്തിന് നേതൃത്വം നല്‍കിയ കോണ്‍ഗ്രസ് അധ്യക്ഷന്‍ തന്നെയാണ്.

എന്നാല്‍ രാഹുലിന്റെ പ്രതികരണത്തിന് തയ്യാറെടുത്ത മാധ്യമങ്ങള്‍ക്ക് അതു ലഭ്യമായില്ല. ഇതിന് പിന്നാലെ രാഹുലിനെതിരെയുള്ള ട്രോളുകളും സോഷ്യല്‍ മീഡിയയില്‍ നിറഞ്ഞു തുടങ്ങി.

രാജ്യം ഉറ്റുനോക്കിയ കര്‍ണാടക തിരഞ്ഞെടുപ്പിനു മുന്നോടിയായുള്ള പ്രചരണവും കൊടുംപിരി കൊണ്ടിരുന്നു. പ്രചരണത്തിന് നേതൃത്വം നല്‍കിയ കോണ്‍ഗ്രസ് ദേശീയ അധ്യക്ഷന്‍ രാഹുല്‍ ഗാന്ധി നടത്തിയ പ്രധാനമന്ത്രി പ്രസ്താവന വലിയ രീതിയിലാണ് ചര്‍ച്ച ചെയ്യപ്പെട്ടത്.

2019ലെ ലോക്സഭാ തിരഞ്ഞെടുപ്പില്‍ കോണ്‍ഗ്രസിന് ഭൂരിപക്ഷം ലഭിച്ചാല്‍ പ്രധാനമന്ത്രിയാകാന്‍ തയ്യാറാണെന്നായിരുന്നു രാഹുല്‍ഗാന്ധി പറഞ്ഞത്. കോണ്‍ഗ്രസിന് ഭൂരിപക്ഷം ലഭിച്ചാല്‍ പ്രധാനമന്ത്രി സ്ഥാനം ഏറ്റെടുക്കും. എന്നാല്‍ 2019ല്‍ നരേന്ദ്രമോദി പ്രധാനമന്ത്രിയാകില്ലെന്നും പറഞ്ഞതോടെ രാഹുലിനെതിരെ ബിജെപി നേതാക്കള്‍ ആഞ്ഞടിച്ചു.

കുതിക്കുന്ന ഇന്ധനവില വര്‍ധനയില്‍ കേന്ദ്രസര്‍ക്കാരിനെതിരെ രാഹുല്‍ പ്രതിഷേധിച്ചത് കര്‍ണാടകയിലെ കോലാര്‍ ജില്ലയിലൂടെ സൈക്കിള്‍ ചവിട്ടി തിരഞ്ഞെടുപ്പ് പ്രചരണം നടത്തിക്കൊണ്ടാണ്. സാധാരണക്കാരില്‍ നിന്ന് കൊള്ളയടിച്ച പണം സമ്പന്നരായ സുഹൃത്തുക്കളിലെത്തിക്കുകയാണ് കേന്ദ്രസര്‍ക്കാരെന്നും കോണ്‍ഗ്രസ് അധ്യക്ഷന്‍ ആരോപിച്ചിരുന്നു. ക്ഷേത്രങ്ങള്‍, പള്ളികള്‍, മിനാരങ്ങള്‍, ആശ്രമങ്ങള്‍, കാര്‍ഷിക മേഖലകള്‍, തുടങ്ങി കര്‍ണാടകയുടെ സകലയിടങ്ങളിലും സന്ദര്‍ശനം നടത്തി രാഹുല്‍ ജനങ്ങളെ നേരില്‍ കണ്ടിരുന്നു. അതൊന്നും തിരഞ്ഞെടുപ്പ് ഫലത്തില്‍ പ്രതിഫലിച്ചിട്ടില്ല.

ദേശീയ അധ്യക്ഷ സ്ഥാനം ഏറ്റെടുത്ത ശേഷം രാഹുല്‍ നേതൃത്വം നല്‍കിയ 5 സംസ്ഥാന തിരഞ്ഞെടുപ്പിലും കോണ്‍ഗ്രസിന് വന്‍ തിരിച്ചടിയേറ്റിരുന്നു. മേഘാലയയിലും ഗോവയിലും ഏറ്റവും വലിയ ഒറ്റ കക്ഷിയായിട്ടും കോണ്‍ഗ്രസിന് അധികാരം പിടിക്കാനായില്ല. തൃപുരയിലും കോണ്‍ഗ്രസ് വമ്പന്‍ പരാജയം ഏറ്റുവാങ്ങി. ഈ പശ്ചാത്തലത്തില്‍ രാഹുലിന്റെ അധ്യക്ഷ സ്ഥാനം സംബന്ധിച്ച് വരെ ചര്‍ച്ചകള്‍ തുടങ്ങിയിട്ടുമുണ്ട്.