ഹരിയാന മുഖ്യമന്ത്രി മനോഹര്‍ ലാല്‍ ഖട്ടറുടെ നേര്‍ക്ക് മഷിയെറിഞ്ഞു. ഹരിയാനയില്‍ ഹിസാറിലെ ഒരു റോഡ് ഷോയ്ക്കായി എത്തിയ സമയത്താണ് മുഖ്യമന്ത്രിക്കു നേരെ മഷിയെറിഞ്ഞത്. വ്യാഴാഴ്ചയാണ് പൊതുപരിപാടിക്കിടെ സുരക്ഷാ മറികടന്ന് എത്തിയ ആള്‍ മഷി എറിഞ്ഞത്.

കറുത്ത മഷിയുമായി എത്തിയ ആള്‍ സുരക്ഷ മറികടന്ന് ഖട്ടറുടെ നേര്‍ക്ക് ഒഴിക്കുകയായിരുന്നു. അപ്രതീക്ഷിതമബായി മഷി ആക്രമണം ഉണ്ടായതോടെ മഷി മുഖ്യമന്ത്രിയുടെ മുഖത്തേക്കും പതിച്ചു. സംഭവത്തിനു പിന്നാലെ അക്രമിയെ സുരക്ഷാ ഉദ്യോഗസ്ഥര്‍ കീഴ്‌പ്പെടുത്തി. ഐഎന്‍എല്‍ഡി പ്രവര്‍ത്തകനാണ് ഇയാളെന്നാണ് സൂചന. കസ്റ്റഡിയിലെടുത്ത ഇയാളെ ചോദ്യം ചെയ്തു വരികയാണ്.

കനത്ത സുരക്ഷാ സന്നാഹങ്ങള്‍ക്ക് നടുവിലാണ് ഹരിയാന മുഖ്യമന്ത്രി മനോഹര്‍ ലാല്‍ ഖട്ടര്‍. കഴിഞ്ഞ നവംബറില്‍ മാധ്യമപ്രവര്‍ത്തകര്‍ പോലും മുഖ്യമന്ത്രിയില്‍ നിന്ന് നിശ്ചിത അകലം പാലിക്കണമെന്ന് നിര്‍ദേശം നല്‍കിയിരുന്നു. ആ സമയത്ത് മാധ്യമപ്രവര്‍ത്തകര്‍ ക്യാമറകളോ മൈക്രോഫോണുകളോ അദേഹത്തിന്റെ വളരെ അടുത്തായി കൊണ്ടുവരരുതെന്ന് സോനിപത്ത് ജില്ലാ ഭരണകൂടം വ്യക്തമാക്കിയിരുന്നു.