അവസാന നിമിഷം വരെ ആത്മവിശ്വാസം പ്രകടിപ്പിച്ചിരുന്ന യെദ്യൂരപ്പ വിശ്വസവോട്ടെടുപ്പിന് മിനിട്ടുകള്‍ ശേഷിക്കെ രാജിവച്ചൊഴിഞ്ഞത് നാടകീയമായി.

വോട്ടെടുപ്പിന് മണിക്കൂറുകള്‍ക്കു മുന്‍പ്തന്നെ വിശ്വാസ വോട്ടെടുപ്പിനു കാത്തു നില്‍തക്കാതെ രാജിവച്ചൊഴിയുമെന്ന വാര്‍ത്ത പരന്നിരുന്നു. അതേസമയം കേവലഭൂരിപക്ഷം ഇല്ലെന്ന് ഉറപ്പായിട്ടും അധികാരത്തിലെത്തുകയും അവസാനനിമിഷംവരെ പിടിച്ചുനില്‍ക്കുകയും രാജിവയ്ക്കുകയും ചെയ്ത യെദ്യൂരപ്പ 1996ലെ വാജ്‌പേയ് സര്‍ക്കാരിനെയാണ് ഓര്‍മ്മിപ്പിക്കുന്നത്.

1996ലെ പൊതുതെരഞ്ഞെടുപ്പില്‍ പി.വി നരസിംഹറാവുവിന്റെ നേതൃത്വത്തിലുള്ള കോണ്‍ഗ്രസ് പരാജയപ്പെട്ടു. ആര്‍ക്കും ഭൂപക്ഷമില്ലാത്ത അവസ്ഥ. ഇതിനിടെ ഏറ്റവും വലിയ ഒറ്റകക്ഷിയായ ബി.ജെ.പി സര്‍ക്കാരുണ്ടാക്കാന്‍ അവകാശവാദമുന്നയിച്ചു. അന്നത്തെ രാഷ്ട്രപതിയായിരുന്ന ശങ്കര്‍ദയാല്‍ ശര്‍മ്മ ബി.ജെ.പിയെ സര്‍ക്കാരുണ്ടാക്കാന്‍ ക്ഷണിക്കുകയും ചെയ്തു.

അങ്ങനെ വാജ്‌പേയ് ഇന്ത്യയുടെ പത്താമത്തെ പ്രധാനമന്ത്രിയായി. എന്നാല്‍ ഭരണത്തിലേറി പതിമൂന്നാമത്തെ ദിവസം വിശ്വാസവോട്ടെടുപ്പിന് തൊട്ടുമുന്‍പ് അദ്ദേഹം രാജിവച്ചൊഴിയുകയായിരുന്നു. അന്ന് വിശ്വാസവോട്ടിന്റെ അവസാന നിമിഷം വികാരഭരിതമായ പ്രസംഗം നടത്തിയാണ് വാജ്‌പേയ് രാജിവച്ചൊഴിഞ്ഞത്. അതേ മാതൃകയാണ് ഇന്നു യദ്യൂരപ്പയും സ്വീകരിച്ചിരിക്കുന്നത്.