തുടർച്ചയായ പന്ത്രണ്ടാം ദിവസമാണ് രാജ്യത്ത് ഇന്ധന വില വർദ്ധിക്കുന്നത്.സംസ്ഥാനത്ത് പെട്രോൾ വില 82 രൂപയായി. ഇന്ന് പെട്രോളിന് 38 പൈസയും ഡീസലിന് 24 പൈസയുമാണ് വർദ്ധിച്ചിരിക്കുന്നത്. ഡീസൽ വില 74ൽ എത്തി. പതിവു പോലെ ഇത്തവണയും അന്താരാഷ്ട്ര വിപണിയിലെ ക്രൂഡോയിൽ വിലയെയാണ് വില വർദ്ധനവിന് കാരണമായി കമ്പനികൾ ചൂണ്ടിക്കാട്ടുന്നത്. അസാധാരണമാം വിധം എണ്ണ വില ഉയർന്നിട്ടും കേന്ദ്ര, സംസ്ഥാന സർക്കാരുകൾ ഒരു നിലപാടും സ്വീകരിച്ചില്ലെന്ന ആക്ഷേപവും ശക്തമാണ്.

ഇന്ത്യൻ ക്രിക്കറ്റ് നായകൻ വിരാട് കോലിയുടെ ഫിറ്റ്നസ്സ് വെല്ലുവിളി സ്വീകരിച്ചു മോദിയോട് ഇന്ധന വില കുറക്കാൻ വെല്ലു വിളിക്കുന്നതായി രാഹുൽ ഗാന്ധി ട്വീറ്റ് ചെയ്തു. ഇല്ലെങ്കിൽ കോൺഗ്രസ്സിന്റെ ഭാഗത്തു നിന്ന് ശക്തമായ സമരം നേരിടണമെന്ന വെല്ലുവിളിയും രാഹുൽ നടത്തി. ഇക്കണക്കിന് പോയാൽ അധികം വൈകാതെ പെട്രോൾ വില നൂറു കടക്കുമെന്ന ആശങ്കയിലാണ് സാധരണക്കാരായ ജനങ്ങൾ