പ്രഥമ പ്രധാനമന്ത്രി ജവഹര്‍ലാല്‍ നെഹ്‌റുവിന്റെ 54ാമത് ചമരവാര്‍ഷികത്തില്‍ അദ്ദേഹത്തിന്റെ ഓര്‍മകള്‍ പുതുക്കി രാഷ്ട്രം. രാവിലെ സമാധിസ്ഥലമായ ശാന്തി വനത്തില്‍ എത്തി രാഷ്ട്രീയ, സാമൂഹ്യ രംഗത്തെ പ്രമുഖര്‍ പുഷ്പാര്‍ച്ചന നടത്തി. കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി, മുന്‍ രാഷ്ട്രപതി പ്രണബ് കുമാര്‍ മുഖര്‍ജി, മുന്‍ ഉപരാഷ്ട്രപതി ഹാമിദ് അന്‍സാരി, മുന്‍ പ്രധാനമന്ത്രി മന്‍മോഹന്‍ സിങ്, കോണ്‍ഗ്രസ് നേതാക്കള്‍ എന്നിവര്‍ പുഷ്പാര്‍ച്ചന നടത്തി.

ചരമവാര്‍ഷികത്തില്‍ നെഹ്‌റുവിന് ശ്രദ്ധാഞ്ജലി അര്‍പ്പിക്കുന്നതായി പ്രധാനമന്ത്രി നരേന്ദ്ര മോദി ട്വീറ്റ് ചെയ്തു. ഇന്ത്യയുടെ പ്രഥമ പ്രധാനമന്ത്രിയായ ജവഹര്‍ലാല്‍ നെഹ്‌റു 1964 മേയ് 27നാണ് അന്തരിച്ചത്. സ്വാതന്ത്ര്യ സമരത്തിന് ഗാന്ധിജിക്കൊപ്പം സജീവ പങ്കാളിയായ നെഹ്‌റു, സ്വാതന്ത്ര്യ ദിനമായ 1947 ആഗസ്റ്റ് 15നാണ് പ്രധാനമന്ത്രിയായി സത്യപ്രതിജ്ഞ ചെയ്തത്.

1929ല്‍ കോണ്‍ഗ്രസ് അധ്യക്ഷനായ നെഹ്‌റുവാണ് ബ്രിട്ടീഷുകാരില്‍ നിന്ന് പൂര്‍ണ സ്വാതന്ത്ര്യം എന്ന മുദ്രാവാക്യം ഉയര്‍ത്തിയത്. ചേരിചേരാ പ്രസ്ഥാനം രൂപീകരിക്കുന്നതിലും അദ്ദേഹം മുന്നില്‍ നിന്ന് പ്രവര്‍ത്തിച്ചു.