നിത്യോപയോഗ സാധനങ്ങള്ക്കു വില എട്ട് ശതമാനം വരെ കൂടും; മുന്നറിയിപ്പുമായി കമ്പനികള് സാധനങ്ങള്ക്ക് കൂടി വില വര്ധിച്ചാല് പിന്നെയുണ്ടാവുക പണപ്പെരുപ്പം
ഇന്ധനവില റോക്കറ്റ് പോലെ കുതിക്കുന്നതിന് പിന്നാലെ നിത്യോപയോഗ സാധനങ്ങള്ക്കും വില കൂടുമെന്ന മുന്നറിയിപ്പുമായി കമ്പനികള്. പായ്ക്ക് ചെയ്ത ഭക്ഷണങ്ങള്, സോപ്പ്, സോപ്പു പൊടി, ഭക്ഷ്യ എണ്ണ , പലവ്യഞ്ജനം തുടങ്ങി നിരവധി നിത്യോപയോഗ സാധനങ്ങളുടെ വില നാല് മുതല് എട്ട് ശതമാനം വരെ വര്ധിക്കുമെന്നാണ് മുന്നറിയിപ്പ്.
നിത്യോപയോഗ സാധനങ്ങളായതിനാല് വില കൂടിയാലും ഡിമാന്റില് മാറ്റമുണ്ടാകില്ലെന്ന് കമ്പനികള് കണക്കുകൂട്ടുന്നു. നിത്യോപയോഗ സാധനങ്ങള്ക്ക് കൂടി വില വര്ധിച്ചാല് പണപ്പെരുപ്പത്തിലേക്ക് നയിക്കും.
നവംബറില് 178 ഉത്പ്പന്നങ്ങളുടെ ജിഎസ്ടി നിരക്ക് 28 ശതമാനത്തില് നിന്ന് 18 ശതമാനമാക്കിയപ്പോള് സോപ്പുത്പ്പന്നങ്ങള്, ഭക്ഷ്യ എണ്ണ തുടങ്ങിയ സാധനങ്ങള്ക്ക് വില കുറഞ്ഞിരുന്നു. 10 മുതല് 20 ശതമാനം വരെ വിലക്കുറവാണ് ഉണ്ടായത്. ഇത് പണപ്പെരുപ്പ നിരക്കിനെ സ്വാധീനിച്ചിരുന്നു.
കഴിഞ്ഞ ഒരു വര്ഷത്തിനിടെ അസംസ്കൃത എണ്ണയുടെ വില 50 ശതമാനമാണ് വര്ധിച്ചത്. ബാരലിന് 80 ഡോളര് വരെ എത്തിയിരുന്നു. കഴിഞ്ഞ ദിവസമാണ് വില കുറഞ്ഞ് 75ലെത്തിയത്. ക്രൂഡ് ഓയില് വില വര്ധനയെ തുടര്ന്ന് രാജ്യത്ത് പെട്രോള്, ഡീസല് വില സര്വകാല റെക്കോര്ഡിലാണ്.
https://www.facebook.com/Malayalivartha
