കച്ചില്‍ വ്യോമസേനാ വിമാനം തകര്‍ന്ന് പൈലറ്റ് മരിച്ചു. എയര്‍ കമാന്‍ഡര്‍ സഞ്ജയ് ചൗഹാനാണ് മരിച്ചത്. ഇന്ന് രാവിലെ 10.30നായിരുന്നു അപകടം. ബെര്‍ജാര ഗ്രാമത്തിലെ ജാംനഗര്‍ വ്യോമത്താവളത്തില്‍ നിന്ന് പതിവ് പരിശീലന പറക്കലിന് പുറപ്പെട്ട ജാഗ്വാര്‍ വിമാനമാണ് തകര്‍ന്നത്.
അപകടത്തില്‍ ഗുരുതരമായി പരിക്കേറ്റ ചൗഹാനെ ആശുപത്രിയില്‍ പ്രവേശിപ്പിച്ചെങ്കിലും മരണം സംഭവിച്ചു. വിമാനം തകര്‍ന്നിടത്ത് മേയുകയായിരുന്ന അഞ്ച് പശുക്കളും ചത്തു.

പതിവായി നടത്തുന്ന പരിശീലനപ്പറക്കലിനിടെയാണ് അപകടം. അസ്സമിലെ മജൗലിയില്‍ വ്യോമസേനയുടെ ഹെലികോപ്റ്റര്‍ തകര്‍ന്ന് രണ്ട് പൈലറ്റുമാര്‍ കൊല്ലപ്പെട്ട സംഭവം നടന്ന് മാസങ്ങള്‍ക്കുള്ളിലാണ് അടുത്ത ദുരന്തം.  അപകടകാരണം അറിവായിട്ടില്ല. സംഭവത്തെ കുറിച്ച് വ്യോമസേന അന്വേഷണത്തിന് ഉത്തരവിട്ടു.