പ്രധാനമന്ത്രി നരേന്ദ്ര മോദിയ്ക്കും കേന്ദ്ര സർക്കാരിനുമെതിരെ രൂക്ഷ വിമർശനങ്ങളുമായി കോൺഗ്രസ് അധ്യക്ഷൻ രാഹുൽ ഗാന്ധി. രാജ്യത്തിന്‍റെ പ്രധാനമന്ത്രി ഇപ്പോൾ കോർപ്പറേറ്റുകളുടെ കളിത്തോഴനാണെന്ന് രാഹുൽ പരിഹസിച്ചു. മധ്യപ്രദേശിൽ കോൺഗ്രസ് അധികാരത്തിലെത്തിയാൽ 10 ദിവസങ്ങൾക്കകം കർഷക വായ്പകൾ എഴുതിത്തള്ളുമെന്നും രാഹുൽ.

മെഹുൽ ചോക്സി, നീരവ് മോദി എന്നിവരൊക്കെയായി മോദിക്ക് ഭായി-ഭായി ബന്ധമാണുള്ളതെന്ന് പറഞ്ഞ രാഹുൽ 30,000കോടി രൂപയൊക്കെ ഒരു മുൻകരുതലുമില്ലാതെ ഇവരെപ്പോലുള്ള കോർപ്പറേറ്റുകൾക്ക് നൽകാൻ മോദിക്കു മാത്രമേ കഴിയൂ എന്നും പറഞ്ഞു.

മോദി അധികാരത്തിലെത്തിയപ്പോൾ മുൻപ് നൽകിയ വാഗ്ദാനങ്ങളെല്ലാം അദ്ദേഹം പാടെ മറന്നുവെന്നും മധ്യപ്രദേശിൽ കോൺഗ്രസ് അധികാരത്തിലെത്തിയാൽ 10 ദിവസങ്ങൾക്കകം കർഷക വായ്പകൾ എഴുതിത്തള്ളുമെന്നും രാഹുൽ പറഞ്ഞു. മന്ദ്സോറിൽ കർഷക സമരത്തിനു നേരെ ഉണ്ടായ വെടിവയ്പിന്‍റെ ഒന്നാം വാർഷികത്തോടനുബന്ധിച്ച് നടന്ന പരിപാടിയെ അഭിസംബോധന ചെയ്ത് സംസാരിക്കുകയായിരുന്നു രാഹുൽ. മോദിയുടെ കേന്ദ്ര സർക്കാരിന് രാജ്യത്തെ കർഷകരുടെ പ്രശ്നങ്ങൾ വിഷയമേ അല്ലെന്നും രാഹുൽ ചൂണ്ടിക്കാട്ടി.

വീഡിയോ കാണാം...