പ്രവാസി മലയാളിയായ കോവിഡ് രോഗി അൽഐനിൽ ആശുപത്രി കെട്ടിടത്തിൽ നിന്ന് വീണ് മരിച്ച നിലയിൽ കണ്ടെത്തി. മലപ്പുറം വാഴക്കാട് സ്വദേശി ഇൻസാഫ് അലിയാണ് മരിച്ചത്. പ്രായം 32 ആണ്. ഇന്ന് രാവിലെയാണ് ഇദ്ദേഹത്തിന് കോവിഡ് സ്ഥിരീകരിച്ചതായി അറിയാൻ കഴിഞ്ഞത്. ഇതിന് തൊട്ടുപിന്നാലെ ഇദ്ദേഹത്തെ ആശുപത്രികെട്ടിടത്തിൽ നിന്ന് വീണ് പരിക്കേറ്റ നിലയിൽ കണ്ടെത്തുകയായിരുന്നു. ആശുപത്രിയുടെ ജനൽചില്ലുകൾ തീകെടുത്താൻ ഉപയോഗിക്കുന്ന ഫയർ എസ്റ്റിങ്ക്യൂഷൻ സിലിണ്ടർ ഉപയോഗിച്ച് തകർത്ത നിലയിൽ കണ്ടെത്തുകയുണ്ടായി.

ആശുപത്രിയിൽ നിന്ന് രക്ഷപ്പെടാൻ ശ്രമിക്കവേ വീണതാണോ, കെട്ടിടത്തിൽ നിന്ന് ചാടിയതാണോ എന്നത് സംബന്ധിച്ച് ഇതുവരെ വ്യക്തതയില്ല. പൊലീസെത്തി ആശുപത്രിയിലെ സി സി ടി വി ദൃശ്യങ്ങൾ ശേഖരിക്കുകയും ചെയ്തിട്ടുണ്ട്. വെറ്ററിനറി ഫാർമസി ജീവനക്കാരനാണ് മരിച്ച ഇൻസാഫ് അലി. സാമൂഹിക പ്രവർത്തകനായ ഇദ്ദേഹത്തിന്റെ ഭാര്യയും മക്കളും സന്ദർശക വിസയിൽ അൽഐനിലുണ്ട്. സംഭവത്തിൽ അന്വേഷണം പുരോഗമിക്കുകയാണ്.

അതേസമയം യുഎഇയില്‍ കഴിഞ്ഞ ദിവസം 1,931 പേര്‍ക്ക് കൂടി കൊവിഡ് വൈറസ് ബാധ സ്ഥിരീകരിച്ചതായി ആരോഗ്യ-പ്രതിരോധ മന്ത്രാലയം അറിയിച്ചു. ചികിത്സയിലായിരുന്ന 1,833 പേര്‍ കൂടി രോഗമുക്തരായപ്പോള്‍ മൂന്ന് കൊവിഡ് മരണങ്ങള്‍ കൂടി രാജ്യത്ത് റിപ്പോര്‍ട്ട് ചെയ്യപ്പെടുകയുണ്ടായി.

കഴിഞ്ഞ 24 മണിക്കൂറിനിടെ രാജ്യത്ത് നടത്തിയ 2,37,130 കൊവിഡ് പരിശോധനകളില്‍ നിന്നാണ് പുതിയ രോഗികളെ കണ്ടെത്തിയിരിക്കുന്നത്. ഇതുവരെയുള്ള കണക്കുകള്‍ പ്രകാരം രാജ്യത്ത് 4,81,937 പേര്‍ക്ക് കൊവിഡ് സ്ഥിരീകരിച്ചു. ഇവരില്‍ 4,66,804 പേരാണ് ഇതിനോടകം രോഗമുക്തരായത്. 1,529 പേരാണ് ഇതുവരെ രാജ്യത്ത് കൊവിഡ് ബാധിച്ച് മരണപ്പെട്ടത്. നിലവില്‍ 13,604 കൊവിഡ് രോഗികള്‍ രാജ്യത്തുണ്ടെന്നാണ് ഔദ്യോഗിക കണക്കുകള്‍.