യാത്രക്കാര്‍ക്ക് മര്‍ഹബ ടാക്‌സി ഒമാന്‍ എന്ന പേരിലുള്ള മൊബൈല്‍ ആപ്പ് ഉപയോഗിച്ച് ടാക്‌സികളുടെ സേവനം പ്രയോജനപ്പെടുത്താം. ആപ്പിലൂടെ ലോക്കേഷന്‍ അറിയിച്ചാല്‍ അടുത്ത സ്ഥലത്ത് നിന്നും മര്‍ഹബ ടാക്‌സി ആവശ്യക്കാര്‍ക്ക് അടുത്തെത്തും. ആപ്പ് ഡൗണ്‍ലോഡ് ചെയ്യുന്നവര്‍ ഫോണ്‍ നമ്പറും ഇ മെയിലും രേഖപ്പെടുത്തണം. വീടിന് മുമ്പില്‍ വാഹനം എത്തുന്നതോടെ 'ഡ്രൈവര്‍ എത്തി' എന്ന സന്ദേശം മൊബൈലില്‍ ലഭിക്കും. ആദ്യത്തെ അഞ്ച് കിലോമീറ്ററിന് 3.5 റിയാലാണ് നിരക്ക്. 

പിന്നീടുള്ള ഓരോ കിലോമീറ്ററിനും 500 ബൈസ തോതില്‍ ഈടാക്കും. ടാക്‌സിയില്‍ ഘടിപ്പിച്ചിരിക്കുന്ന ട്രാക്കിംഗ് സംവിധാനത്തിന്റെ സഹായത്തോടെ ലക്ഷ്യസ്ഥാനത്ത് എത്തിയാല്‍ ഇ മെയില്‍ വഴി റസിപ്റ്റ് ലഭിക്കും. സഞ്ചരിച്ച റൂട്ട്, യാത്രക്കെടുത്ത സമയം തുടങ്ങിയ വിവരങ്ങള്‍ റസിപ്റ്റില്‍ രേഖപ്പെടുത്തിയിട്ടുണ്ടാകും. എന്നാല്‍ മര്‍ഹബ ടാക്‌സികളുടെ പരീക്ഷണ ഓട്ടമാണ് ഇപ്പോള്‍ നടക്കുന്നത്. പരിശീലനം ലഭിച്ച 100 ഡ്രൈവര്‍മാരാണ് ഇപ്പോഴുള്ളത്. 200 ഡ്രൈവര്‍മാരുടെ സേവനത്തോടെ ഔദ്യോഗിക ലോഞ്ചിംഗ് ഉടന്‍ ഉണ്ടാകുമെന്നും അധികൃതര്‍ വ്യക്തമാക്കി.