പ്രവാസി മലയാളിക്ക് 7.8 കോടി, സമ്മാനത്തിന് അർഹനായത് ദുബൈ ഡ്യൂട്ടി ഫ്രീ മില്ലെനിയം മില്ലനയര്‍ നറുക്കെടുപ്പില്‍, സമ്മാനത്തുകയില്‍ നല്ലൊരു ശതമാനം റിട്ടയര്‍മെന്റിന് ശേഷമുള്ള ജീവിതത്തിനായി മാറ്റിവയ്ക്കും...!
പ്രവാസികൾക്കൊപ്പമാണ് ഭാഗ്യം എന്ന് പറയാതിരിക്കാൻ പറ്റില്ല. കാരണം ബിഗ് ടിക്കറ്റ് ഉൾപ്പെടെയുള്ള നടുക്കെടുക്കെപ്പിലൂടെ ഭാഗ്യം പരീക്ഷിച്ച് കോടികൾ പ്രവാസികൾ സ്വന്തമാക്കിയ വാർത്തകളാണ് അടുത്തിടെയായി പുറത്തുവരുന്നത്. ഇത് ഇപ്പോഴും മാറ്റമില്ലാതെ തുടരുകയാണ്. ഇപ്പോളിതാ മറ്റൊരു പ്രവാസി കൂടി കോടീശ്വരനായിരിക്കുകയാണ്.
ദുബൈ ഡ്യൂട്ടി ഫ്രീ മില്ലെനിയം മില്ലനയര്‍ നറുക്കെടുപ്പില്‍ പ്രവാസി മലയാളിക്ക് 10 ലക്ഷം ഡോളര്‍ ആണ് സമ്മാനത്തുകയായി കിട്ടിയിരിക്കുന്നത്. അതായത് 7.8 കോടി ഇന്ത്യന്‍ രൂപയാണ് കിട്ടിയിരിക്കുന്നത്.ഒമാനിലെ മസ്‌കറ്റില്‍ താമസിക്കുന്ന അറുപത്തിരണ്ടുകാരനായ ജോണ്‍ വര്‍ഗീസിനാണ് വന്‍ തുക സമ്മാനം ലഭിച്ച ഭാഗ്യശാലി.
ഇദ്ദേഹം മേയ് 29ന് വാങ്ങിയ 0982 എന്ന ടിക്കറ്റ് നമ്പരിനാണ് സമ്മാനത്തുക കിട്ടിയിരിക്കുന്നത്.ദുബൈ അന്താരാഷ്ട്ര വിമാനത്താവളത്തിലെ കോണ്‍കോഴ്‌സ് ഡിയില്‍ നടന്ന മില്ലെനിയം മില്ലനയര്‍ 392-ാമത് സീരീസ് നറുക്കെടുപ്പിലാണ് ഇദ്ദേഹം സമ്മാനാര്‍ഹനായത്.
മുപ്പത്തിയഞ്ച് വര്‍ഷമായി ദുബൈയ്ക്കും മസ്‌കറ്റിനും ഇടയില്‍ ഇടക്കിടെ യാത്ര ചെയ്യാറുള്ള ജോണ്‍, കൊവിഡിന് മുമ്പ് ദുബൈ എയര്‍പോര്‍ട്ടിലെ ദുബൈ ഡ്യൂട്ടി ഫ്രീ ഫൈനസ്റ്റ് സര്‍പ്രൈസ് കൗണ്ടറില്‍ നിന്നായിരുന്നു ടിക്കറ്റ് വാങ്ങിയിരുന്നത്.ആറു വര്‍ഷമായി ദുബൈ ഡ്യൂട്ടി ഫ്രീ പ്രൊമോഷനില്‍ പങ്കെടുത്തു വരികയായിരുന്ന ഇദ്ദേഹം, മസ്‌കറ്റില്‍ ഒരു കണ്‍സ്യൂമര്‍ ഗുഡ്‌സ് കമ്പനിയിലെ ജനറല്‍ മാനേജരാണ്.
റിട്ടയര്‍മെന്റിന് ശേഷമുള്ള ജീവിതത്തിനായി സമ്മാനത്തുകയില്‍ നല്ലൊരു ശതമാനം മാറ്റി വെക്കും. ബാക്കിയുള്ളതില്‍ ഒരു ഭാഗം സ്ത്രീകള്‍ക്കും കുട്ടികള്‍ക്കും ഗുണകരമാകുന്ന രീതിയില്‍ ജീവകാരുണ്യ പ്രവര്‍ത്തനങ്ങള്‍ക്കായി നല്‍കാനുമാണ് ജോണ്‍ വര്‍ഗീസിന്റെ തീരുമാനം.
ആദ്യമായാണ് ഒരു നറുക്കെടുപ്പില്‍ വിജയിക്കുന്നതെന്നും ഇപ്പോള്‍ ദുബൈ ഡ്യൂട്ടി ഫ്രീ തന്റെ ജീവിതത്തിന്റെ ഭാഗമാണെന്നും അദ്ദേഹം കൂട്ടിച്ചേര്‍ത്തു. 1999ല്‍ മില്ലെനിയം മില്ലനയര്‍ പ്രൊമോഷന്‍ തുടങ്ങിയത്.അന്നുമുതലുള്ള കണക്കെടുത്താൽ 192-ാമത്തെ ഇന്ത്യക്കാരനാണ് ഇദ്ദേഹം.
https://www.facebook.com/Malayalivartha
