ബിഗ് ബോസ് മലയാളം സീസണ്‍ 3 സംഭവബഹുലമായിട്ടാണ് തുടങ്ങിയത്. വ്യത്യസ്ത മേഖലകളിൽ നിന്നും തികച്ചും വ്യത്യസ്തമായ ചുറ്റുപാടിൽ നിന്നും വന്നവരെ ഒരുമിച്ചൊരു വീട്ടിൽ നൂറു ദിവസം താമസിക്കാൻ വിടുന്നു എന്നതാണ് ബിഗ് ബോസിനെ വ്യത്യസ്തമാക്കുന്നത് . ഇന്ത്യയിൽ ഒട്ടുമിക്ക ഭാഷയിലും ബിഗ് ബോസ് റിയാലിറ്റി ഷോ ഉണ്ട്. അതിന്റെ മലയാളം പതിപ്പാണ് ബിഗ് ബോസ് മലയാളം. ഒരു കൂട്ടം മത്സരാർത്ഥികളെ പുറം ലോകവുമായി യാതൊരു ബന്ധവുമില്ലാതെ കുറച്ചു നാൾ ഒരു വീട്ടിൽ ഒരുമിച്ചു ജീവിക്കാൻ അനുവദിക്കുന്നു. എന്നിട്ടു ഓരോ ദിവസവും അവർക്കു ഓരോ ടാസ്കുകൾ നൽകുകയും അവരുടെ ഓരോ നീക്കങ്ങളും ക്യാമറയിൽ ഒപ്പിയെടുത്തു പ്രേക്ഷകരിലെത്തിക്കുകയും ചെയ്യുന്നു അതാണ് ബിഗ് ബോസ്.

ഓരോ ആഴ്ചയും രണ്ടു മത്സരാർത്ഥികളെ വീതം വീട്ടിൽ നിന്നു പുറത്താക്കുകയും അങ്ങനെ ഏറ്റവും ഒടുവിൽ വീട്ടിൽ അവശേഷിക്കുന്ന ആളെ വിജയിയായി പ്രഖ്യാപിക്കുകയുമാണ് ചെയ്യുന്നത്. ബിഗ് ബോസ് മൂന്നാം സീസണിന്റെ ആദ്യം ദിനം തന്നെ പ്രേക്ഷക ശ്രദ്ധ പിടിച്ചു പറ്റിയ താരമാണ് മുട്ടോളം മുടിയുള്ള ഫ്രീക്ക് പെണ്ണ് ഡിമ്പൽ. ആദ്യ എപ്പിസോഡിൽ തന്നെ തന്റെ വ്യക്തിത്വം കൊണ്ട് ബിഗ്‌ബോസ് ക്യാമറ കണ്ണുകളെ പരമാവധി സമയം തന്റെ നേരെ നിർത്താൻ ഡിമ്പൽന് സാധിച്ചു.

ബിഗ് ബോസ് ആദ്യ ദിനം അവസാനിച്ചപ്പോൾ സ്‌കോർ ചെയ്തത് ഡിമ്പൽ തന്നെയാണെന്ന് നിസംശയം പറയാം. അതോടെ മുൻപ് കണ്ടു പരിചയമില്ലാത്ത ഡിമ്പൽനെ കുറിച്ച് മലയാളികൾ അന്വേഷണവും തുടങ്ങി. സോഷ്യൽ മീഡിയയിലെങ്ങും ഡിമ്പൽ തന്നെയാണ് ഇപ്പോൾ താരം. തന്റേതായ വ്യക്തിത്വം എടുത്തു കാണിക്കുന്ന തരത്തിലുള്ള ഒരു മത്സരമാണ് ഡിമ്പൽ ആദ്യ എപ്പിസോഡിൽ കാഴ്ച വെച്ചത്. തനിക്കു പറയാനുള്ളത് ആരോടാണെങ്കിലും എവിടെ വെച്ചാണെങ്കിലും മുഖത്ത് നോക്കി പറയാനുള്ള ധൈര്യം തന്നെയാണ് ഡിമ്പൽനെ വ്യത്യസ്ത ആക്കുന്നത്. മോഡലും ഒരു സൈക്കോളജിസ്റ്റുമാണ് ഡിമ്പൽ. സൂര്യ ടിവിയിൽ മുൻപ് സംപ്രേക്ഷണം ചെയ്ത മലയാളി ഹൌസ് എന്ന പരിപാടിയിലെ റണ്ണർ അപ്പായ തിങ്കൾ ബാലിന്റെ സഹോദരി ആണ് ഡിമ്പൽ ബാൽ. തിങ്കളും ഡിമ്പലും കൂടി ഒരു ബിസിനസ്സും നടത്തി വരുന്നുണ്ട്. ഇപ്പോഴും ചിരിക്കുന്ന മുഖവുമായി കാണാറുള്ള ഡിംബലിന്റെ ജീവിതത്തിൽ ഒരു നോവിന്റെ കഥയുമുണ്ട്.

ഒരു ക്യാൻസർ സർവൈവർ ആണ് ഡിമ്പൽ. പന്ത്രണ്ടാമത്തെ വയസ്സിൽ ആണ് നട്ടെല്ലിന് ക്യാൻസർ ബാധിക്കുന്നത്. നട്ടെല്ല് അലിഞ്ഞു പോകുന്ന അവസ്ഥ ആയിരുന്നു. അതിനോട് പോരാടി വിജയിച്ച ആത്മവിശ്വാസം ആണ് ഡിമ്പലിന്റെ ആത്മവിശ്വാസത്തിന് കാരണം. തന്റെ വ്യക്തിത്വ രൂപീകരണത്തിന് ഇത് ഒരു വലിയ പങ്കു വഹിച്ചിട്ടുണ്ട് എന്ന് ഡിമ്പൽ തന്നെയാണ് വ്യക്തമാക്കിയത്. നട്ടെല്ലിൽ ശസ്ത്രക്രിയ ചെയ്ത പാട് ഡിമ്പൽ തന്നെ ചിത്രങ്ങളിലൂടെ പങ്കു വെച്ചിട്ടുണ്ട്. ബിഗ്‌ബോസിന്റെ തുടക്കത്തിൽ തന്നെ ആധിപത്യം സ്ഥാപിച്ച താരത്തിന്റെ പേര് പോലെ തന്നെ അവർ പകുതി മലയാളിയും പകുതി നോർത്ത് ഇന്ത്യനും ആണ്. ഡിമ്പലിന്റെ ‘അമ്മ മലയാളിയും അച്ഛൻ ഉത്തർ പ്രദേശ് സ്വദേശിയുമാണ്. മോഡലിംഗിൽ സജീവമായ താരത്തിന്റെ മുടി തന്നെയാണ് ഏറെ ശ്രദ്ധേയം. ക്ലിനിക്കൽ സൈക്കോളജിയിൽ എംഎസ്സിയും എംഫില്ലും പൂർത്തിയാക്കിയ ആളാണ് ഡിംമ്പൽ.

കെട്ടിലും മട്ടിലും മാറ്റങ്ങളോടെയാണ് കൂടുതല്‍ മത്സരാര്‍ത്ഥികളുമായാണ് ഇത്തവണ ബിഗ് ബോസ് എത്തിയിരിക്കുന്നത്. ബിഗ് ബോസ് മലയാളത്തിന്റെ രണ്ടാം സീസണ്‍ കോവിഡിന്റെ പശ്ചാത്തലത്തില്‍ ഫിനാലെ നടത്താതെ അവസാനിപ്പിക്കുകയായിരുന്നു. കഴിഞ്ഞ സീസണില്‍ ഡോ. രജത് കുമാറായിരുന്നു സമൂഹമാധ്യമങ്ങളില്‍ ഏറെ തരംഗം തീര്‍ത്ത മത്സരാര്‍ത്ഥി. എന്നാല്‍ മറ്റൊരു മത്സരാര്‍ത്ഥിയുടെ കണ്ണില്‍ മുളകു തേച്ച വിവാദവുമായി ബന്ധപ്പെട്ട് ഡോ. രജത് കുമാറിന് ഷോയില്‍ നിന്നും പുറത്തുപോവേണ്ടി വരികയും അത് ഏറെ വിവാദങ്ങള്‍ക്ക് വഴിവെക്കുകയും ചെയ്തിരുന്നു.

ബിഗ് ബോസിന്റെ ആദ്യ സീസണും മലയാളം ടെലിവിഷന്‍ പ്രേക്ഷകര്‍ക്കിടയില്‍ ഏറെ ജനപ്രീതി നേടിയിരുന്നു. നടനും അവതാരകനുമായ സാബുമോനാണ് ബിഗ്ഗ് ബോസ് ടൈറ്റില്‍ സ്വന്തമാക്കിയത്. പേളി മാണിയും മോഡലും നടനുമായ ഷിയാസ് കരീമുമാണ് റണ്ണര്‍ അപ്പ് പുരസ്കാരങ്ങള്‍ നേടിയത്. ബിഗ് ബോസ് ഹൗസിലെ പേളി- ശ്രീനീഷ് അരവിന്ദ് പ്രണയവും തുടര്‍ന്നുള്ള ഇരുവരുടെയും വിവാഹവുമെല്ലാം ഏറെ വാര്‍ത്താപ്രാധാന്യം നേടിയിരുന്നു.