എ.കെ ലോഹിതദാസ് എന്ന സംവിധായകൻ മലയാളത്തിന് സമ്മാനിച്ച നായികയായിരുന്നു ഭാമ. നിവേദ്യം എന്ന സിനിമയിലൂടെയായിരുന്നു താരത്തിന്റെ സിനിമാ അരങ്ങേറ്റം. സത്യഭാമ എന്ന അമ്പലവാസി കുട്ടിയുടെ റോളിൽ ഭാമ തിളങ്ങി.

കുസൃതിയും കുറുമ്പുമായി പപ്പടം വിറ്റ് നടക്കുന്ന സത്യഭാമ എന്ന കൗമാരക്കാരിയെ ഭാമ മികച്ചതാക്കി. നിവേദ്യത്തിലെ 'കോലക്കുഴൽ വിളി കേട്ടോ...' എന്ന ഗാനത്തിലെ ശാലീന സുന്ദരിയായാണ് ഭാമയെ ഇന്നും പ്രേക്ഷകർ കാണുന്നത്. അതിന് പിന്നാലെ തെന്നിന്ത്യയിലെ മറ്റ് ഭാഷകളിൽ നിന്നും ഭാമയ്ക്ക് അവസരങ്ങൾ ലഭിച്ച് തുടങ്ങി.

2020 ജനുവരിയിലായിരുന്നു ഭാമയുടെ വിവാഹം നടന്നത്. കോട്ടയത്തെ സ്വകാര്യ ഹോട്ടലിൽ വെച്ചായിരുന്നു വിവാഹം. എറണാകുളം സ്വദേശിയും വിദേശ മലയാളിയുമായ അരുൺ ആണ് ഭാമയെ വിവാഹം ചെയ്തത്. അടുത്ത ബന്ധുക്കളും സുഹൃത്തുക്കളും വിവാഹത്തിൽ സന്നിഹിതരായിരുന്നു. വീട്ടുകാർ ആലോചിച്ച് ഉറപ്പിച്ച വിവാഹമാണെന്ന് അന്ന് ഭാമ പറഞ്ഞിരുന്നു. ഭാമയുടെ സഹോദരിയുടെ ഭർത്താവിന്റെ സഹപാഠി കൂടിയായിരുന്നു അരുൺ.

കഴിഞ്ഞ വർഷമാണ് ഭാമയ്ക്കും അരുണിനും പെൺകുഞ്ഞ് പിറന്നത്. കുഞ്ഞ് പിറന്ന വിവരം ഭാമ തന്നെയാണ് സോഷ്യൽമീഡിയ വഴി പങ്കുവെച്ചത്. ആദ്യത്തെ കൺമണിയുടെ ചിത്രം പങ്കുവെക്കാൻ പലതവണ താരത്തിന്റെ ആരാധകർ ആവശ്യപ്പെട്ടിരുന്നുവെങ്കിലും ഭാമ തയ്യാറായിരുന്നില്ല. സമയമാകുമ്പോൾ പങ്കുവെക്കാം എന്നാണ് ഭാമ അറിയിച്ചിരുന്നത്.

ഇപ്പോഴിതാ മകളുടെ ഒന്നാം പിറന്നാൾ ആഘോഷത്തിന്റെ ചിത്രങ്ങളും വീഡിയോകളുമാണ് ഭാമ സോഷ്യൽമീഡിയ വഴി പങ്കുവെച്ചിരിക്കുന്നത്. ​​ഗൗരി എന്നാണ് മകൾക്ക് ഭാമയും അരുണും പേര് നൽകിയിരിക്കുന്നത്. ഇരുവരുടേയും ഫ്ലാറ്റിലാണ് ആഘോഷമായി മകളുടെ ഒന്നാം പിറന്നാൾ ആഘോഷം കുടുംബത്തോടൊപ്പം നടത്തിയത്. മകളുടെ ആദ്യ ചിത്രങ്ങൾ കണ്ട് ഭാമയുടെ ഭർത്താവ് അരുണിന്റെ മുഖഛായയാണ് ​ഗൗരിക്ക് എന്നാണ് ആരാധകർ കുറിച്ചത്.

ചിലർ ഭാമയുടെ ചെറുപ്പകാലം പോലെയുണ്ടെന്നും കുറിച്ചു. പിങ്ക് നിറത്തിലുള്ള വസ്ത്രങ്ങൾ അണിഞ്ഞാണ് ഭാമയും മകൾ ​ഗൗരിയും വീഡിയോയിൽ പ്രത്യക്ഷപ്പെട്ടിരിക്കുന്നത്. ഭാമയുടെ ആദ്യത്തെ കൺമണിക്ക് ആരാധകരും പ്രിയപ്പെട്ടവരും അടക്കം നിരവധിപേർ പിറന്നാൾ ആശംസകൾ നേർന്നു. വളരെ പെട്ടന്ന് ഒരു വർഷം കടന്നുപോയ പോലെ തന്നോയിയെന്ന് മകളുടെ പിറന്നാൾ ദിനത്തിൽ ഭാമ കുറിച്ചിരുന്നു. വിവാഹശേഷം സിനിമയിൽ നിന്നും വിട്ടുനിൽക്കുകയാണ് ഭാമ. സോഷ്യൽമീഡിയകൾ വഴിയാണ് താരം ആരാധകരോട് സംവദിക്കുന്നതും വിശേഷങ്ങൾ പങ്കുവെക്കുന്നതും.