തുടര്‍ച്ചയായ മൂന്നാം വിജയത്തോടെ പരമ്പര സ്വന്തമാക്കാമെന്ന ഓസ്‌ട്രേലിയയുടെ മോഹങ്ങള്‍ക്ക് ഇംഗ്ലണ്ടിന്റെ പ്രഹരം. ആവേശം നിറഞ്ഞ മൂന്നാം ഏകദിനത്തില്‍ 93 റണ്‍സിന്റെ ആധികാരിക ജയം ഇംഗ്ലണ്ട് സ്വന്തമാക്കി. സെഞ്ചുറി നേടിയ ജെയിംസ് ടെയ്‌ലറാണ്(101) കളിയിലെ കേമന്‍.
ടോസ് നേടി ബാറ്റിങ്ങിനിറങ്ങിയ ഇംഗ്ലണ്ട് നിശ്ചിത ഓവറില്‍ എട്ട് വിക്കറ്റ് നഷ്ടത്തില്‍ 300 റണ്‍ നേടി. മറുപടി ബാറ്റിങ്ങിനിറങ്ങിയ ഓസീസ് 44 ഓവറില്‍ 207 റണ്‍ നേടുന്നതിനിടെ എല്ലാവരും പുറത്തായി.
ആദ്യ ബാറ്റിങ്ങിനിറങ്ങിയ ഇംഗ്ലണ്ടിന് തുടക്കം തകര്‍ച്ചയോടെയായിരുന്നു. ഓപ്പണര്‍ അലക്‌സ് ഹെയില്‍സ് ഒമ്പത് റണ്ണിന് പുറത്തായി. എന്നാല്‍ ജേസണ്‍ റോയി(63), ജെയിംസ് ടെയ്‌ലര്‍(101), നായകന്‍ ഇയോണ്‍ മോര്‍ഗന്‍(62) എന്നിവര്‍ ഉണര്‍ന്ന് കളിച്ചതോടെ ഇംഗ്ലണ്ട് സ്‌കോര്‍ 300ല്‍ എത്തി. ഓസീസിനായി പാറ്റ് കമ്മിന്‍സും ഗ്ലെന്‍ മാക്‌സ്വെല്ലും രണ്ടു വിക്കറ്റ് വീതം വീഴ്ത്തി.

മറുപടി ബാറ്റിങ്ങിനിറങ്ങിയ ഓസീസിനെ ഒരു രീതിയിലും നിലയുറപ്പിക്കാന്‍ ഇംഗ്ലണ്ട് ബൗളര്‍മാര്‍ അനുവദിച്ചില്ല. ആറാം ഓവറില്‍ ഓസീസിനു ഓപ്പണര്‍ ജോ ബേണ്‍സിനെ(9) നഷ്ടമായി. പിന്നീട് ആരോണ്‍ ഫിഞ്ച്(53), നായകന്‍ സ്റ്റീവ് സ്മിത്ത് (25), ജോര്‍ജ് ബെയ്‌ലി (25), ഗ്ലെന്‍ മാക്‌സ്വെല്ല് (17), മിച്ചല്‍ മാര്‍ഷ്(13) മാത്യു വേയ്ഡ്(42) എന്നിവര്‍ ഇംഗ്ലീഷ് ബൗളിങ്ങിനു മുന്നില്‍ മുട്ട്കുത്തിയതോടെ ഓസീസ് തോല്‍വി ഏറ്റുവാങ്ങി. ഇംഗ്ലണ്ടിനായി ലിയാം പ്ലങ്കെറ്റ്, മോയിന്‍ അലി എന്നിവര്‍ മൂന്നു വിക്കറ്റ് വീതം വീഴ്ത്തി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha