ഓസ്‌ട്രേലിയ്‌ക്കെതിരായ ഒന്നാം ക്രിക്കറ്റ് ടെസ്റ്റില്‍ വെസ്റ്റ് ഇന്‍ഡീസിനു കനത്ത തോല്‍വി. ഇന്നിംഗ്‌സിനും 212 റണ്‍സിനുമാണ് വിന്‍ഡീസ് തോറ്റത്. ഇന്നു മാത്രം 14 വിന്‍ഡീസ് വിക്കറ്റുകളാണ് ഓസീസ് പിഴുതത്. ആദ്യ ഇന്നിംഗ്‌സില്‍ 223 റണ്‍സിനു പുറത്തായി ഫോളോ ഓണ്‍ ചെയ്ത വിന്‍ഡീസ് രണ്ടാം ഇന്നിംഗ്‌സില്‍ 148 റണ്‍സിനു പോരാട്ടം അവസാനിപ്പിച്ചു.

ഒന്നാം ഇന്നിംഗ്‌സില്‍ 207/6 എന്ന നിലയിലാണ് വിന്‍ഡീസ് മൂന്നാം ദിനം ബാറ്റിംഗ് തുടങ്ങിയത്. 94 റണ്‍സോടെ ക്രീസിലുണ്ടായിരുന്ന ഡാരന്‍ ബ്രാവോ സെഞ്ചുറി നേടിയത് മാത്രമാണ് വിന്‍ഡീസിനു സന്തോഷിക്കാനുള്ളത്. ബ്രാവോ 108 റണ്‍സ് നേടി പുറത്തായി. രണ്ടാം ദിനം ബ്രാവോയ്ക്ക് ഒപ്പം പൊരുതി നിന്ന കിമര്‍ റോച്ച് 31 റണ്‍സിനു പുറത്തായി. നാല് വിക്കറ്റ് നേടിയ ജോഷ് ഹേസില്‍വുഡും മൂന്ന് വിക്കറ്റ് വീഴ്ത്തിയ നഥാന്‍ ലയോണുമാണ് വിന്‍ഡീസിനെ തകര്‍ത്തത്. 

ഫോളോ ഓണ്‍ ചെയ്ത വിന്‍ഡീസിനെ രണ്ടാം ഇന്നിംഗ്‌സില്‍ കാത്തിരുന്നത് കൂട്ടത്തകര്‍ച്ചയാണ്. ഓപ്പണര്‍ ക്രെയ്ഗ് ബ്രാത്‌വൈറ്റ് (94) മാത്രമാണ് പൊരുതി നിന്നത്. മൂന്ന് ബാറ്റ്‌സ്മാന്‍മാര്‍ മാത്രമാണ് രണ്ടക്കം കടന്നത്. 27 റണ്‍സിനു അഞ്ച് വിക്കറ്റ് വീഴ്ത്തിയ ജയിംസ് പാറ്റിന്‍സണ്‍ ആണ് വിന്‍ഡീസിന്റെ രണ്ടാം ഇന്നിംഗ്‌സിലെ അന്തകന്‍. ഹേസില്‍വുഡ് മൂന്ന് വിക്കറ്റ് നേടി. ആഡം വോജസിന്റെ അതിവേഗ ഇരട്ട സെഞ്ചുറിയുടെ ബലത്തില്‍ ആദ്യം ബാറ്റ് ചെയ്ത ഓസീസ് 583 എന്ന കൂറ്റന്‍ സ്‌കോര്‍ പടുത്തുയര്‍ത്തിയിരുന്നു. 182 റണ്‍സ് നേടിയ ഷോണ്‍ മാര്‍ഷ് വോജസിനു ശക്തമായ പിന്തുണയും നല്‍കിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha