സയിദ് മുഷ്താഖ് അലി ട്വന്റി-20യില്‍ കേരളത്തിനു തുടര്‍ച്ചയായ നാലാം ജയം. കേരളം 50 റണ്‍സിനു കരുത്തരായ സൗരാഷ്ട്രയെ തോല്‍പ്പിച്ചു. ആദ്യം ബാറ്റ് ചെയ്ത കേരളം 20 ഓവറില്‍ ഒന്‍പത് വിക്കറ്റിനു 165 റണ്‍സ് നേടി. മറുപടി ബാറ്റിംഗില്‍ സൗരാഷ്ട്രയ്ക്ക് 20 ഓവറില്‍ ഒന്‍പത് വിക്കറ്റിന് 115 റണ്‍സ് നേടാനെ കഴിഞ്ഞുള്ളൂ.
രോഹന്‍ പ്രേം നേടിയ അര്‍ധ സെഞ്ചുറിയാണ് കേരളത്തിനു മികച്ച സ്‌കോറിന് അടിത്തറയായത്. പ്രേം 43 പന്തില്‍ അഞ്ച് ഫോറും രണ്ടു സിക്‌സും ഉള്‍പ്പടെ 56 റണ്‍സ് നേടി. സച്ചിന്‍ ബേബി (30 പന്തില്‍ 43), റൈഫി വിന്‍സന്റ് ഗോമസ് (15 പന്തില്‍ 25) എന്നിവരും തിളങ്ങി. സഞ്ജു സാംസണ്‍ ഒരു റണ്‍ നേടി പുറത്തായി. സൗരാഷ്ട്രയ്ക്ക് വേണ്ടി ജയദേവ് ഉനദ്കട് മൂന്ന് വിക്കറ്റ് വീഴ്ത്തി.
മറുപടി ബാറ്റിംഗില്‍ ഒരു ഘട്ടത്തിലും സൗരാഷ്ട്ര വിജയ പ്രതീക്ഷ ഉയര്‍ത്തിയില്ല. മുന്‍നിര തകര്‍ന്നടിഞ്ഞപ്പോള്‍ ക്യാപ്റ്റന്‍ ചേതേശ്വര്‍ പൂജാര 26 റണ്‍സ് നേടി ചെറുത്തുനിന്നു. വാലറ്റത്ത് 20 പന്തില്‍ 32 റണ്‍സ് അടിച്ചുകൂട്ടിയ ഉനദ്കട് തന്നെ ബാറ്റിംഗിലും തിളങ്ങി. മൂന്ന് വിക്കറ്റ് വീതം നേടിയ മനു കൃഷ്ണന്‍, പ്രശാന്ത് പത്മനാഭന്‍ എന്നിവരാണു സൗരാഷ്ട്രയെ തകര്‍ത്തത്. വി.എ. ജഗദീഷ് രണ്ടു വിക്കറ്റ് നേടി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha